खोज

काठमाडौं ।

श्रम, रोजगार तथा सामाजिक सुरक्षामन्त्री शरतसिंह भण्डारीले दक्षिण कोरियाको तीव्र आर्थिक विकासमा नेपाली श्रमिकहरूको योगदान रहेको बताएका छन्। बिहीबार ललितपुरमा आयोजित ‘हामी एप’ सार्वजनिक कार्यक्रममा बोल्दै मन्त्री भण्डारीले नेपालीहरू विभिन्न मुलुकमा पसिना बगाएर काम गरिरहेको स्मरण गर्दै, त्यसले ती देशहरूलाई समृद्ध बनाएको उल्लेख गरे।

उनले छोटो समयमा कोरियाले विकासमा फड्को मारेको चर्चा गर्दै त्यसमा नेपाली कामदारहरूको भूमिका पनि रहेको बताए। ‘ती देशहरूले नेपाली कामदारको योगदानलाई कदर गर्नुपर्छ’, मन्त्री भण्डारीको भनाइ थियो।

कार्यक्रममा मन्त्री भण्डारीले सुरक्षित आप्रवासन, श्रमिकको सम्मानजनक जीवन र मुलुकले पाएका नागरिकसरह सेवा–सुविधा सुनिश्चित हुनुपर्ने कुरामा जोड दिए। ‘हाम्रा श्रमिकहरूले आफ्नो रगत, पसिना बगाएर ती देशहरू समृद्ध बनाएका छन्’, उनले भने, ‘त्यसैले उनीहरूलाई पनि त्यस्तै सम्मान र सुविधा मिल्नुपर्छ।’

कोरियाली सीप, प्रविधि र अनुभव नेपालले अनुशरण गर्नुपर्ने बताउँदै उनले वैदेशिक रोजगारीबाट फर्केका नेपाली श्रमिकहरूले ती सीप र अनुभवलाई स्वदेशमै उपयोग गर्नुपर्नेमा जोड दिए।

मन्त्री भण्डारीका अनुसार सरकारले अहिले विभिन्न गन्तव्य मुलुकहरूसँग द्विपक्षीय श्रम सम्झौताहरू गर्दैछ। साथै, अन्तरर्राष्ट्रिय मञ्चहरूमा समेत समान व्यवहारको माग उठाइरहेको जानकारी दिँदै, अबको प्राथमिकता सुरक्षित रोजगारी र श्रमिकको अधिकार सुनिश्चित गर्नु रहेको बताए।उनले वैदेशिक रोजगारसम्बन्धी सरकारी संरचना पुनःसंरचना गरेर अघि बढिरहेको पनि जानकारी गराए।