खोज

बर्दिया, १२ असार ।

बर्दियामा सञ्चालनमा रहेको कृषिमा आधारित विभिन्न जोन तथा सुपर जोन समन्वय समितिको बैठक गुलारिया बसेको छ । प्रधानमन्त्री कृषि आधुनिकीकरण परियोजना कार्यान्वयन इकाई बर्दियाको आयोजनामा नीति तथा कार्यक्रम कार्यान्वयन तथा अनुगमनका लागि समन्वय बैठक बसेको हो ।

बैठकमा माछा जोन, धान जोन, केरा जोन, गाई भैँसी जोन लगायतमा आबद्ध कृषकहरूले सम्बन्धित जोनको अवस्था, चुनौती र अगामी दिनमा परियोजनाले गर्नुपर्ने क्रियाकलाप बारे धारणा राखेका थिए । बैठकमा बोल्दै माछा जोन बढैयातालका इन्द्र प्रसाद लुइँटेलले माछामा आबद्ध कृषक सन्तुष्ट रहेको बताउँदै क्षेत्र बिस्तार, आवश्यक पानीको लागि बोरिङ तथा बजारीकरणका लागि पहल गर्नु पर्ने बताए । माछा पालनमा रोजगारीको सृजना समेत हुने र युवाहरू विदेश नगई स्थानीय स्तरमा पालन गरी रहेको बताए । बैठकमा बोल्दै अर्का किसान केरा जोन गुलरियाका शम्भु प्रसाद अधिकारीले केराको राम्रो व्यापार भइरहेको बताए । अन्य जोन जस्तै केरा जोनका लागि बजेट बढाउनु पर्ने बताए ।

कार्यक्रममा बोल्दै काशीराम पौडेलले प्रधानमन्त्री कृषि आधुनिकीकरण परियोजनाको सेवाले आफूहरू सन्तुष्टि भएको बताए । कार्यक्रममा बोल्दै जिल्ला समन्वय समितिका प्रमुख सूर्य बहादुर विष्टले पछिल्लो समय जिल्लामा मकै खेतीले पनि राम्रो प्रगति गरिरहेको हुनाले मकैको लागि पनि निर्धारण वा विशेष योजना बनाउनु पर्ने बताए ।

जिल्लामा अवस्था अनुसारको माटो सुहाउँदो खेती र कार्यक्रम गर्न परियोजनालाई सुझाव दिए । बैठकमा सबै जोनका बिचार सुने पछि बोल्दै परियोजना प्रमुख बिरेन्द्रराज पराजुलीले किसानको समस्या समाधानका लागी किसानको पनि जिम्मेवारी रहेको बताए । सिँचाइको लागि पहल गर्ने उत्पादनका निम्ति थोरै मात्रै भएपनी मध्यस्थकर्ताको सहयोग चाहिने बताए ।

किसानको माग र योजनाहरू अगामी वर्षमा समेटिने प्रमुख पराजुलीले प्रतिबद्धता व्यक्त गरे । कार्यक्रममा परियोजनाले हाल सम्म गरेको प्रगति, विनियोजन भएको बजेट, लाभान्वित सङ्ख्या, देखिएको चुनौती समेतको प्रस्तुति परियोजना इकाइका कृषि अधिकृत युगराज बिकले गरेको थियो । कार्यक्रममा जिल्ला समन्वय समितिकी उपप्रमुख अमिता कुमारी यादव, एकीकृत कृषि तथा पशुपन्छी विकास कार्यालयका प्रमुख सागर ढकाल, विभिन्न पालिकाका माछा पालन, गाइ भैँसी पालन, केरा खेती, धानखेती गर्ने किसान र सञ्चार कर्मीहरूको उपस्थिति रहेको थियो ।