खोज

काठमाडौँ ।

सरकारले संयुक्त अरब इमिरेट्स (यूएई) जाने नेपाली कामदारका लागि नयाँ न्यूनतम पारिश्रमिक व्यवस्था कार्यान्वयनमा ल्याएको छ। सोमबार राजपत्रमा प्रकाशित सूचनासँगै यो निर्णय अब कानुनी रूपमा लागू भएको हो।

अबदेखि म्यानपावर कम्पनीहरूले तोकिएको भन्दा कम तलबमा नेपाली कामदार यूएई पठाउन पाउने छैनन्। सरकारले यसअघि जेठमा नै पारिश्रमिक दर बढाउने निर्णय गरेको थियो, जुन राजपत्रमा प्रकाशित भएसँगै प्रभावमा आएको हो।

नयाँ व्यवस्थाअनुसार, अब १ हजार दिराम वा त्यसभन्दा कम पारिश्रमिकको मागपत्र सरकारबाट प्रमाणीकरण हुनेछैन। यसअघि अदक्ष कामदारका लागि तोकिएको न्यूनतम पारिश्रमिक ८ सय दिराम थियो। अब उक्त सीमा बढाएर १ हजार दिराम पारिश्रमिक र ४ सय दिराम मासिक खाना खर्चसहित कुल १ हजार ४ सय दिराम तोकिएको छ।

अर्धदक्ष कामदारलाई १ हजार २ सय दिराम पारिश्रमिक र ४ सय दिराम खाना खर्चसहित १ हजार ६ सय दिराम दिइनुपर्नेछ। दक्ष श्रमिकका हकमा यो रकम १ हजार ५ सय पारिश्रमिक र ४ सय खाना खर्चसहित १ हजार ९ सय दिराम तोकिएको छ।

उच्च दक्ष कामदारका लागि भने न्यूनतम ६ हजार दिराम पारिश्रमिक र ४ सय दिराम खाना खर्चसहित कुल ६ हजार ४ सय दिरामको व्यवस्था गरिएको छ।

सरकारको यस कदमले वैदेशिक रोजगारमा जाने नेपाली कामदारहरूको आर्थिक सुरक्षामा योगदान पुर्‍याउने विश्वास गरिएको छ। साथै, वैदेशिक रोजगारमा रहेका नेपालीहरूको न्यूनतम अधिकार र सम्मानजनक जीवनस्तर सुनिश्चित गर्न यो नीति लागू गरिएको बताइएको छ।