खोज

कपिलवस्तु, १० असार ।

दिवङ्गत क्रिकेट खेलाडीको सम्झनामा कपिलवस्तु क्रिकेट सङ्घको आयोजनामा भएको दोस्रो नगर स्तरीय स्मृति कप क्रिकेट प्रतियोगिताको उपाधि कपिलवस्तु नगरपालिका वडा नम्बर २ र ९ ले संयुक्त रूपमा प्राप्त गरेका छन् । जेठ ३१ गते देखी सञ्चालन गरी नगरका १२ वटा वडाका टोली सहभागी खेलको फाइनल वर्षाका कारण अवरुद्ध हुँदा फाइनल प्रवेश गरेका दुवै टोलीलाई संयुक्त रूपमा विजेता घोषित गरिएको हो ।

सङ्घका जिल्ला अध्यक्ष प्रकाश गैरे, कपिलवस्तु नगरपालिकाका प्रमुख सुदिप पौडेल, वडा नम्बर १ का अध्यक्ष मोहम्मद जाहिद खाँ, वडा नम्बर ४ का अध्यक्ष रावेन्द्र तिवारी, वडा नम्बर १२ का अध्यक्ष ईन्सान अली धुनिया, कालिकाका अध्यक्ष मन्दिप सिंह, निर्माण व्यवसायी सङ्घका जिल्ला अध्यक्ष सरोज अर्याल, क्रिकेट सङ्घका जिल्ला सचिव अजय शर्मा, कोषाध्यक्ष पदमराज श्रेष्ठ र सदस्य माया ज्ञवालीले विजयी टोलीलाई शिल्ड, प्रमाणपत्र र प्रत्यक टोलीलाई नगद ३०÷३० हजार राशीको पुरस्कार हस्तान्तरण गरे । प्रतियोगितामा म्यान अफ द सिरिज भएका वडा नम्बर ३ का खेलाडी संदिप मौर्यलाई शिल्ड, प्रमाणपत्र र नगद ३ हजार पुरस्कार हस्तान्तरण गरिएको थियो ।

सो अवसरमा बोल्दै कपिलवस्तु नगरपालिकाका प्रमुख सुदिप पौडेलले पछिल्लो समय नेपालले अन्तरराष्ट्रिस्तरमा नै उत्कृष्ठ प्रदर्शन गरेर देशको शिर उच्च बनाएको बताए । जिल्लाका युवा खेलाडी रौनक श्रीवास्तवले गरेको प्रदर्शनले कपिलवस्तुमा क्रिकेट खेल प्रतिको धारणा थप सकारात्मक बन्दै गएको उनले स्पष्ट पारेँ । कपिलवस्तु नगरपालिकाले खेलाडीको प्रतिभा उजागर गर्न खेल क्षेत्रलाई प्राथमिकता दिएको र खेलमा लगानी बढाउन तत्पर रहेको उनको भनाइ थियो । विगतमा जिल्लाको क्रिकेट खेलमा योगदान पूर्याएका दिवङ्गत पदाधिकारी र खेलाडीको सम्झनामा आयोजित खेललाई भविष्यमा निरन्तरता दिइने कपिलवस्तु क्रिकेट सङ्घका अध्यक्ष प्रकाश गैरेले प्रतिबद्धता जनाए ।

उनले खेल क्षेत्रको विकासका लागि पूर्वमन्त्री तथा सांसद सुरेन्द्रराज आचार्यको पहलकदमीको प्रशंसा गर्दै खेलाडीको प्रतिभा उजागर गर्न प्रतियोगिताले भूमिका खेलेको बताए । प्रतियोगिता दिवङ्गत पूर्व पदाधिकारी बनारसी लाल वर्मा, दिवङ्गत खेलाडीहरू राजेन्द्र प्रताप शाक्य, दिपेन्द्र सिंह रावल, विजय शर्मा, धिरेन्द्र सिंह, कमल राना, रंजित अग्रहरी, रत्नेश गुप्ता, खगेन्द्र कार्की र श्रवण गुप्ताको सम्झनामा दोस्रो स्मृती कप आयोजना गरिएको थियो ।