नवलपरासी, ०९ असार ।
जिल्लाको प्रतापपुर गाउँपालिकाले अगामी आर्थिक वर्ष २०८२/०८३ का लागि पौने अर्बको बजेट सहित गाउँ सभा सम्पन्न गरेको छ । गाउँ सभामा प्रस्तुत कुल ७६ करोड ३९ लाख ६७ हजार ९ सय को बजेट पास गर्दै गाउसभा सम्पन्न गरेको हो ।
गाउँपालिका अध्यक्ष उमेश चन्द्र यादवको अध्यक्षतामा बसेको गाउँ सभामा गाउँपालिकाकी उपाध्यक्ष मानकुमारी चौधरीले अगामी वर्षको आय व्यय विवरण, बजेट तथा कार्यक्रम प्रस्तुत गरेकी थिइन् ।
सो भन्दा पहिला गाउँपालिका अध्यक्ष यादवले सभामा अगामी वर्षको नीति कार्यक्रम प्रस्तुत गरेका थिए । सोही नीति कार्यक्रममा आधारित बजेट कार्यक्रम पनि उपाध्यक्षले पेस गरेकी थिइन् । प्रस्तुत बजेटमा समानीकरण अनुदान सङ्घीय र प्रदेशको गरी १३ करोड,८५ लाख ३२ हजार, सर्त अनुदान चालु सङ्घीय र प्रदेश गरी २४ करोड ८० लाख, सर्त अनुदान पुजिँगत, सङ्घ र प्रदेश गरी ४ करोड ६९ लाख, विशेष अनुदान चालु सङ्घीय सरकारको १ करोड १२ लाख, विशेष अनुदान पुजिँगत प्रदेशको १७ लाख, समपूरक अनुदान सङ्घ र प्रदेश गरी ३ करोड ८८ लाख गरी कुल रकम ४८ करोड ५१ लाख ३२ हजार अन्तर सरकारी वित्तीय हस्तान्तरण अन्तर्गतको आयको अनुमान गरिएको छ ।
त्यसै गरी राजस्व बाँडफाँडबाट प्राप्त हुने आय रकममा मूल्य अभिवृद्धि कर ८ करोड ३७ लाख ५ हजार १ सय ६८,अन्तःशुल्क २ करोड ७९ लाख १ हजार ७ सय २३, सवारीसाधन कर १ करोड १० लाख ६० हजार, बन रोयल्टी ३ लाख,जलविद्युत रोयल्टी ४३ लाख, घरजग्गा रजिष्टे«सन ८० लाख गरी कुल १३ करोड ४३ लाख ६६ हजार ८ सय ९१ रुपिया अनुमान गरिएको छ । आन्तरिक राजस्व पनि ३ करोड ५० लाख अनुमान गरेको छ,भन्ने मौज्दात रहेको १० करोड ९४ लाख ६९ हजार ९ रुपियाँ हुने अनुमान छ ।
यसै गरी व्ययको अनुमान पनि प्रस्तुत गरिएको थियो । नीति कार्यक्रम तर्फ गाउँपालिका अध्यक्ष यादवले पालिका भित्रका कृषकले जडान गरेका सिचाई मिटरमा लाग्ने सबै विद्युत् महसुल पालिकाले तिर्ने गरी बजेट बनाइएको घोषणा गरेका थिए । बजेट प्राथमिकतामा संस्थागत सुदृढीकरण र सुशासन, दिगो पूर्वाधार तथा सहरी विकास, कला, संस्कृति, सम्पदा संरक्षण, सुलभ आधार भुत स्वास्थ्य सेवा, रोजगार मूलक आधारभूत शिक्षा, लैगिँक समानता, वातावरण संरक्षण, सहकारी प्रवर्द्धन, कृषि तथा सिचाई,बालबालिका तथा अपाङ्गमैत्री व्यवस्थापन, विपद् न्यूनीकरण र उद्धार, रोजगार प्रवर्द्धन तथा गरिबी न्यूनीकरण, रोजगार प्रवर्द्धन र प्रवृद्धियुक्त एवँ नागरिक मैत्री सार्वजनिक सेवा रहेको बताइएको थियो ।
२१ मंसिर २०८२, आइतबार
