खोज

काठमाडौं ।

अभिनेता अनमोल केसी र चलचित्र ‘फर्की फर्की’ टिममाथि कलाकार नरेन्द्रबहादुर श्रेष्ठले जिल्ला अदालत काठमाडौंमा मुद्दा दायर गरेका छन्। मुद्दामा उनीहरूले चलचित्रमा प्रयोग गरिएको मोबाइल नम्बर दुरुपयोग गरेको र यो नम्बर हटाउन अनुरोध गर्दा पनि एमएसएम ओटीटी प्लेटफर्मबाट हटाइएको नभएको जनाइएको छ।

नरेन्द्रबहादुरले यो दुरुपयोगका कारण मानसिक र शारीरिक हानि भएको दाबी गर्दै कानुनी कारबाही र उचित क्षतिपूर्ति माग गरेका छन्।

मुद्दामा उल्लेख छ, ‘चलचित्र रिलिज भएयता मेरो फोन नम्बर अनमोल केसीसँग सम्पर्क गर्नेहरूबाट बारम्बार फोन आउन थालेको छ। यसका कारण मैले आफ्नो मोबाइल स्वीच अफ गर्नुपरेको छ।’

फोन आउन थालेपछि पहिलोमा आफ्नो नम्बर भएको जानकारी गराए पनि पछि सयौँ नम्बरबाट फोन आउन थालेको, र अनमोल केसीलाई दिन आग्रह गर्दा पनि रोकिएको छैन। यसले पीडितको मानसिक स्वास्थ्यमा असर पुर्‍याएको दाबी गरिएको छ।

मुद्दामा अनमोल केसी, निर्देशक सुयोग गुरुङ, चलचित्र जाँच समिति (सेन्सर बोर्ड), तथा रोहित अधिकारीलाई पनि फेला पारेर कानुनी कारबाही गर्न माग गरिएको छ। पीडितले नियामक निकायहरूलाई पटकपटक पत्र लेखे पनि सुनुवाइ नभएको भन्दै मुद्दा दायर गरेको रिट निवेदनमा उल्लेख छ।

अघिल्लो समयमा चलचित्र विकास बोर्डका अध्यक्ष भुवन केसीलाई फोन गरेर समस्या जानकारी गराए पनि समाधान नभएको र निर्देशक सुयोग गुरुङले आश्वासन मात्र दिएको तर समस्या टुंगो नलागेको आरोप पनि छ।

चलचित्र ‘फर्की फर्की’को एउटा संवादमा हिरोइन जसिता गुरुङले अनमोल केसीको नम्बर माग्छिन् र उनी दिन्छन्। त्यसै नम्बरलाई दुरुपयोग गरी पीडितलाई लगातार फोन गरिने गरेको जनाइएको छ।