खोज

काठमाडौँ ।

मलेसियामा जारी पुरुष यू–१६ इस्ट कप क्रिकेट प्रतियोगितामा नेपाली युवा टोलीले विजयी सुरुवात गरेको छ। पहिलो खेलमा सिंगापुरविरुद्ध नेपालले ४ विकेटको सहज जित हात पारेको हो। सिंगापुरले दिएको १३९ रनको लक्ष्य नेपालले ३३.३ ओभरमै भेट्टायो।

नेपालका ओपनर प्रसिद्ध जैसीको संयमित र अविजित अर्धशतकले जितको आधार तयार गर्‍यो। उनले ९७ बल खेलेर नटआउट ५५ रन बनाए। सुरुवातमा सुर्याशु कोइरालासँगको ४१ रनको साझेदारीले नेपाललाई राम्रो सुरुवात दिलायो, यद्यपि सुर्याशु ७ बलमै ९ रन बनाएर रिटायर्ड हर्ट भए।

दोस्रो विकेटका लागि प्रसिद्धले रौनक श्रीवास्तवसँग मिलेर ६३ रनको महत्वपूर्ण साझेदारी गरे। रौनकले आक्रामक शैलीमा ४० रन बनाए। यता जोय थापा (४) र सुगम बुढाथोकी (०) सस्तैमा आउट भए पनि शुभम खनाल (९*) र प्रसिद्धले टिमलाई जितसम्म पुर्‍याए।

यसअघि टस जितेर ब्याटिङ गरेको सिंगापुर ३६.१ ओभरमै १३८ रनमा समेटिएको थियो। कप्तान रियन नायकले सर्वाधिक ५३ रन बनाउँदै टिमलाई सम्मानजनक स्कोरमा पुर्‍याए। नेपालका लागि कप्तान विपिन शर्माले उत्कृष्ट बलिङ गर्दै ४ विकेट लिए भने सचिन भट्टले ३ विकेट लिए।

यो जितसँगै नेपाल समूह ‘ए’ मा बलियो स्थितिमा पुगेको छ। अब उसले मंगलबार जापानसँग, आइतबार इन्डोनेसियासँग र समुह चरणको अन्तिम खेलमा भुटानसँग प्रतिस्पर्धा गर्नेछ।