खोज

नवलपरासी ।

पूर्व–पश्चिम राजमार्गअन्तर्गत नवलपरासीको दाउन्ने खण्डमा भएको सडक अवरोधका कारण मालवाहक ट्रकहरू छ दिनदेखि सडकमै रोकिएका छन्। नवलपुरस्थित विनयी खोलामा आएको बाढी र दाउन्ने क्षेत्रमा सडक चिप्लो भएका कारण गाडी चलाउन नसकिने अवस्था आएको प्रहरीले जनाएको छ।

सुरुका तीन दिन चालकहरू जङ्गलको बीचमा गर्मी, भोक र असहज परिस्थितिमा बस्न बाध्य भए। अहिले उनीहरूलाई बजार क्षेत्रमा सारिएको छ, जसले खान र बस्नको सहजता केही दिलाएको छ। यद्यपि सडक कहिले खुल्ने भन्ने अनिश्चितताले गन्तव्यमा पुग्ने विषयमा अन्योल कायमै छ।

प्रहरीले जोखिम कम गर्न ट्रकहरूलाई बजार क्षेत्रमा होल्ड गरेको हो। लामो समयसम्म बाटोमा रोकिएपछि केही ट्रक चालकहरू फर्कन थालेका छन्।

दुम्कीबासस्थित विनयी खोलामा बनाइएको डाइभर्सन बाढीले आठ पटकसम्म बगाएपछि अब थप प्रयास नगरिने निर्णय भएको छ। साना तथा हलुका सवारीलाई वैकल्पिक रूपमा होङ्शी सिमेन्टको बाटो हुँदै झण्डै २८ किलोमिटर लामो घुम्ती मार्ग प्रयोग गर्न दिइएको छ। तर राति ७ बजेदेखि बिहान ५ बजेसम्म सबै प्रकारका गाडी सञ्चालनमा पूर्ण प्रतिबन्ध लगाइएको छ।

अवरुद्ध सडकका कारण आपूर्ति शृङ्खला र ट्रान्सपोर्ट क्षेत्र प्रभावित हुँदा जनजीवनमा असर पर्न थालेको छ। स्थानीय प्रशासनले वैकल्पिक व्यवस्था खोज्ने प्रयास जारी रहेको जनाएको छ।