खोज

सल्यान, ०८ असार ।

केन्द्रीय सरकारले समेत प्रमुख पर्यटकीय गन्तव्यको रूपमा छनौट गरेको सल्यानको कु पिण्डे तालको विकास र पर्यटन प्रवर्द्धनका लागि साढे आठ करोड बढी रुपैयाँ लगानी गरिने भएको छ । कर्णाली प्रदेश सरकारले आगामी दुई वर्षभित्र प्रमुख पर्यटकीय गन्तव्य ‘मिनी रारा’ का नामले परिचित कु पिण्डे तालको संरक्षण, व्यवस्थापन तथा पूर्वाधार विकासका लागि साढे आठ करोड बढी बजेट विनियोजन गरेको हो ।

कर्णाली प्रदेश सरकारको वार्षिक विकास कार्यक्रम अन्तर्गत उद्योग, पर्यटन वन तथा वातावरण मन्त्रालयबाट आठ करोड ५९ लाख ५३ हजार रुपैयाँ विनियोजन गरिएको छ । कु पिण्डे ताल संरक्षण गुरुयोजना कार्यान्वयनका लागि चार करोड ९९ लाख ५३ हजार र कु पिण्डे दह जलाधार क्षेत्र संरक्षण तथा पर्यटन प्रवर्द्धनका लागि तीन करोड ६० लाख बजेट विनियोजन भएको उद्योग, पर्यटन वन तथा वातावरण मन्त्रालयले जनाएको छ ।

नगाड कु पिण्डे नगरपालिका वडा नं ८ मा अवस्थित कु पिण्डे ताल प्राकृतिक सौन्दर्य, जैविक विविधता, धार्मिक किम्बदन्ती र मौसमी विशेषताका कारण पर्यटन गन्तव्यको रूपमा परिचित हुँदै आएको छ । ताल सम्म पुग्नका लागि गेट निर्माण, पिकनिक स्थल, टिकट काउन्टरका लागि आवश्यक संरचना तथा मन्दिर एवं शौचालय निर्माणको योजना रहेको उद्योग, पर्यटन वन तथा वातावरण मन्त्री एवम् सल्यानबाट प्रदेशसभा सदस्य सुरेश अधिकारीले जानकारी दिए ।

उनले भने, “यस अघि तयार भएको गुरुयोजना अनुसार काम गर्नका लागि बजेट व्यवस्था गरिएको हो । यसका साथै माथि तिरबाट दहमा माटो, बालुवा बगेर आएर नभरियोस् भन्नका लागि चेक ड्यामहरू निर्माण गर्ने र दहको पहिलेकै आकारमा भरिएको माटो, बालुवा व्यवस्थापन गर्ने योजना रहेको छ ।” सडक विस्तार तथा संरचना निर्माणको क्रममा माटो ढुङ्गा खस्दा ताल साँघुरिँदै गएको, डिल कटान बढेको र पानीको सतह घट्दै गएको अवस्थामा प्रदेश सरकारले जलाधार क्षेत्र संरक्षणका लागि प्रयास थालेको हो ।

प्राकृतिक सुन्दरताको अनुपम नमुना कु पिण्डे ताल सबैभन्दा उच्च महत्वको पर्यटन गन्तव्यको रूपमा रहेको छ । सल्यान सदरमुकामदेखि करिब १५ किलोमिटर टाढा पर्ने यो ताल असाध्य मनमोहक छ । ३० हेक्टर क्षेत्रफलमा रहेको कु पिण्डे तालको लम्बाई १ हजार २ सय मिटर, चौडाइ २ सय ५० मिटर, गहिराइ ५१ मिटर रहेको छ ।

सत्ययुगमा एक जोगी कु पिण्डे गाउँमा घुम्न आएका बेला रात परेपछि कसैले बास नदिएको र एक बुढी आमाले बास दिएपछि ती जोगीले भोलि बिहानै उठेर डाँडामा गई हेर्नुहोला भनेपछि भोलिपल्ट डाँडामा गई हेर्दा पूरै गाउँ पुरिएर ताल बनेको किम्बदन्ती रहेको छ । बस्ती पुरिएर ताल बनेकाले कहिलेकाहीँ भाले बास्ने, जाँतो पिस्ने आवाज आउने गरेको स्थानीय बताउँछन् । कुपिण्डो आकारको भएकाले कु पिण्डे ताल नामकरण गरिएको स्थानीयको भनाइ छ ।

प्रदेश सरकारले नयाँ आर्थिक वर्षबाट गुरुयोजना कार्यान्वयन तीव्र बनाउने बताएको छ । सरोकारवाला निकायबीच समन्वय, जनप्रतिनिधि र स्थानीय समुदायबिचको सहकार्य र वातावरणीय संवेदनशीलतालाई ध्यान दिएर तालको संरक्षण गरिएमा ‘मिनी रारा’ को उपमा पाएको कु पिण्डे तालको विकासमा नयाँ प्रगति हुने र पर्यटकको सङ्ख्यामा वृद्धि भएर स्थानीय अर्थतन्त्रमा पनि सहयोग पुग्ने देखिन्छ ।