खोज

भैरहवा, ०७ असार ।
मास्टर्स ११ क्रिकेट क्लबको आयोजनामा शनिबार देखि भैरहवामा ३ दिने एसियन बुद्ध टी–१० क्रिकेट प्रतियोगिताको आयोजना हुने भएको छ । क्रिकेट सम्बन्धित क्रियाकलाप गराउने उद्देश्य सहित दर्ता भएको मास्टर्स ११ क्लबले क्रिकेट खेलाडी उत्पादन गर्ने तथा क्रिकेट प्रति चासो जगाउने उद्देश्य सहित प्रतियोगिताको आयोजना गर्न लागेको हो ।
प्रतियोगिताबारे जानकारी शुक्रबार भैरहवामा आयोजित पत्रकार सम्मेलनमा बोल्दै रुपन्देही क्रिकेट सङ्घका अध्यक्ष हरि बहादुर थापाले १० ओभरको खेल प्रतियोगिता हुने जानकारी दिए । उनले प्रत्येक टोलीले ३ जना खेलाडी जिल्ला बाहिरका राख्न पाउने गरी नियम बनाइएको र अहिलेसम्म १४ वटा टिमहरू दर्ता भएको बताए ।

प्रतियोगिताको विजेता टोलीले नगद ८० हजार सहित ट्रफि सहित प्रमाणपत्र, दोस्रो हुनेले ४० हजार तथा तेस्रो र चौथो हुनेले सान्त्वना पुरस्कारको रूपमा १०–१० हजार रुपैयाँ प्राप्त गर्ने बताए । यस बाहेक प्रत्येक खेलको उत्कृष्ट खेलाडी, प्रतियोगिताको उत्कृष्ट खेलाडी, उत्कृष्ट बलर, उत्कृष्ट ब्यट्सम्यान, फिल्डर, बढी छक्का हान्ने खेलाडी तथा दर्शकलाई समेत पुरस्कारको व्यवस्था गरिएको उनले बताए ।

प्रतियोगितालाई भैरहवा स्थित एसियन बुद्ध होटलले मुख्य प्रायोजन गरेको छ । होटलको सामाजिक उत्तरदायित्व अन्तर्गत क्रिकेट प्रतियोगितालाई सहयोग गरिएको होटलका व्यवस्थापक ओम प्रकाश पाण्डेले जानकारी दिए । उनले होटलले विभिन्न समयमा सामाजिक उत्तरदायित्व अन्र्तगतका विभिन्न क्रियाकलापहरू आयोजना गरिरहेको बताए ।  प्रतियोगिता भैरहवा स्थित सिद्धार्थ क्रिकेट रङ्गशालामा हुनेछ । प्रतियोगिताको उद्घाटन सिद्धार्थनगर नगर पालिकाका प्रमुख ईस्तियाक अहमद खाँनले गर्ने कार्यक्रम रहेको छ ।