खोज

काठमाडौँ ।

सत्तारुढ एमालेले भिजिट भिसा प्रकरणमा गृहमन्त्री रमेश लेखकमाथि छानबिनको माग गर्दै संसद् अवरुद्ध गरिरहेका राष्ट्रिय स्वतन्त्र पार्टी (रास्वपा) सँग कुनै सम्झौता नहुने स्पष्ट पारेको छ।

एमालेका मुख्य सचेतक महेश बर्तौलाले भने, सदन सञ्चालन प्रमुख प्रतिपक्षी दलसँगको सहमतिअनुसार भइरहेको छ र अन्य दलसँग कुनै सम्झौता हुने छैन। उनले दलहरूबीच अलग-अलग सम्झौता सम्भव नरहेको पनि बताएका छन्।

उनका अनुसार, ‘सरकारले सहमति गरेपछि पनि रास्वपा स्टन्टमा लागिरहेको छ। प्रधानमन्त्रीसँगको प्रश्नोत्तर कार्यक्रम नियमअनुसार नै तय गरिएको थियो। अर्को दिन गरौँ भनेर मिल्दैन। सभामुखले नाराबाजीको कारणले प्रधानमन्त्रीलाई अगाडि ल्याउन नचाहँदा कार्यसूचीबाट हटाउनुभयो।’

रास्वपाले स्टन्ट गर्न नीलो रिबन र कालो लुगा लगाएर संसद् आएको र जेठ १३ देखि सदन अवरुद्ध गर्दै आएको एमालेको आरोप छ। केही समयअघि नेकपा माओवादी केन्द्र पनि रास्वपासँगै गृहमन्त्रीमाथि छानबिनको माग गर्दै संसद् अवरुद्ध गर्दै आएको थियो। तर पछि माओवादी केन्द्रले सत्तापक्षसँग दुई बुँदे सहमति गरेर सदन सञ्चालनमा सहयोग गरेको थियो। अहिले सदन अवरुद्ध गर्ने दलहरू राष्ट्रिय स्वतन्त्र पार्टी र राष्ट्रिय प्रजातन्त्र पार्टी मात्र रहेका छन्, जसले गृहमन्त्रीसँग छानबिनको माग गर्दै आएका छन्।