खोज

 काठमाडौं।

नेकपा एकीकृत समाजवादीका सांसद प्रकाश ज्वालाले इजरायल र इरानमा रहेका नेपालीको सुरक्षाका लागि सरकार गम्भीर हुनुपर्ने आवश्यकता औंल्याएका छन्। प्रतिनिधिसभाको आजको बैठकमा बोल्दै उनले इजरायल–इरान युद्ध चर्कंदै गइरहेको अवस्थामा त्यहाँ रहेका नेपालीहरूलाई तत्काल उद्धार गर्न सरकारको ध्यानाकर्षण गराए।

उनका अनुसार इजरायलमा करिब पाँचदेखि सात हजार नेपालीहरू केयर गिभर, कृषि फार्म र अन्य क्षेत्रमा कार्यरत छन्, भने इरानमा पनि एक दर्जनजति नेपाली रहेका छन्। युद्धको असर नेपालीहरूमाथि नपुग्नुअघि नै कूटनीतिक पहलमार्फत उनीहरूलाई सुरक्षित स्थानमा ल्याउन उनले सरकारलाई आग्रह गरे।

सांसद ज्वालाले यसअघि इजरायलमै हमासको आक्रमणमा परी नेपाली विद्यार्थीहरूले ज्यान गुमाएको घटना स्मरण गराउँदै, “क्षति भएपछि खोजी गर्नुको अर्थ हुँदैन,” भन्दै तत्काल कारबाही र पहलकदमीको खाँचो औंल्याए। अझै पनि उद्धार हुन नसकेका नेपाली नागरिक बिपिन जोशीको विषय उठाउँदै उनले त्यस्ता नियति अरू नेपालीले भोग्न नपरोस् भन्ने चेतावनी दिए।

त्यस्तै, युक्रेन–रुस युद्धमा संलग्न नेपालीहरूको अवस्थाबारे पनि सांसद ज्वालाले चिन्ता व्यक्त गरे। उनले कम्तीमा ७३ नेपाली मारिएको र तीन सयजति अझै बेपत्ता रहेको जानकारी दिँदै सरकारसँग त्यसबारे यकिन तथ्यांक समेत नरहेको उल्लेख गरे।

सांसद ज्वालाका अनुसार पछिल्लो समय युद्धमा मृत्यु भएका नेपाली सल्यानका ताराप्रकाश घर्ती हुन्, भने बेपत्तामध्ये सन्तोष विष्टजस्ता युवाहरू अझै सम्पर्कविहीन छन्। उनले अवैध रूपमा रुसी सेनामा भर्ती गराइएका नेपालीहरूलाई स्वदेश फर्काउन सरकारलाई तत्काल कूटनीतिक माध्यममार्फत पहल गर्न आह्वान गरे।