खोज

बर्दघाट, ४ असार ।

पूर्व पश्चिम राजमार्ग अन्तर्गत बर्दघाट दुम्किबास सडक खण्ड पूर्ण अवरुद्ध बनेको छ । गएरातीको वर्षाले दुम्किबास स्थित विनयी खोलामा निर्माण गरिएको डाइभर्सन बगाएपछि विहान करिव ५ बजेबाट सडक अवरुद्ध बनेको हो ।

पूर्व पश्चिम राजमार्गमा पर्ने विनयी खोलामा पर्ने पूल केहि महिना पहिले भाँचिए पछि डाइभर्सन बनाइ सडक सन्चालन गरिँदै आएको छ । सामान्य वर्षामै उर्लिएर आउने विनयी खोलाले यसअघि पनि पटक पटक डाइभर्सन बगाउँदा यातायात सँचालन अवरुद्ध हुँदै आएको थियो ।

पूर्व पश्चिम राजमार्ग स्तरोन्नतीको जिम्मा पाएको ठेकेदार कम्पनी चाइना स्टेट इन्जिनियरिङ्ग कर्पोरेशनले विनयी खोलामा नयाँ पूल बनाउन ढिला गर्दा यो सडक भइ आवत जावत गर्ने सवारी सास्ती खेप्न बाध्य भएका हुन ।

केहि दिन पहिले पूलको ढलाइको काम सम्पन्न भएपनि पूल सँचालनमा आउन अझै केहि दिन लाग्ने निर्माण कम्पनीले जनाएको छ । वर्षातको मौसम सुरु भइसक्दा समेत पूल सँचालनमा नआएपछि डाइभर्सनबाटै यातायात सँचालन गर्नुपर्ने बाध्यता रहेको छ ।

विहान करिव ५ बजेबाट सडक अवरुद्ध भएपछि पश्चिमबाट पूर्वतर्फ जाने सवारीहरु बर्दघाट क्षेत्रमा रोकिएका छन । बर्दघाट क्षेत्रमा करिव ५ सय बढि सवारी रोकिएको बर्दघाट ट्राफिक कार्यालयले जनाएको छ यस्तै दुम्किबास क्षेत्रमा करिव १ हजार २ सय सवारी रोकिएको दुम्किबास ट्राफिक प्रहरी कार्यालयका वरिष्ठ ट्राफिक नायव निरिक्षक विनोद जोशीले जानकारी दिए ।

बुधबार विहान करिव १० बजेसम्म पनि विनयी खोलामा पानीको वहाव नघटेका कारण डाइभर्सन निर्माण गर्न कठिनाइ भइरहेको जोशिले बताए । पानीको वहाव नघटेसम्म डाइभर्सन निर्माण गर्न नसकिने र वहाव घटे पनि कम्तिमा ४ घण्टा जाम खुल्ने सम्भावना नरहेको उनले जानकारी दिए ।

यात्रुवाहक सवारी र साना सवारीलाई भने होङ्गसी सिमेन्ट गेटको बाटो हुँदै सँचालनमा ल्याइएको उनले बताए ।