खोज

बुटवल, ४ असार । बुटवलमा जारी उजिरसिह रनिङसिल्ड टि–ट्वान्टी क्रिकेट प्रतियोगिता २०८२ को उपाधिका लागि बेष्ट्रनल क्रिकेट क्लब र न्यू होराईजन क्रिकेट क्लब भिड्ने भएको छ । बुटवल उपमहानगरपालिकाको सहयोग तथा बुटवल क्रिकेट विकास समितिको आयोजनामा बुटवलमा जारी प्रतियोगिताको लिग चरणमा बेष्ट्रन २ खेलमा विजयी हुदै तथा न्यू होराईजन १ खेलमा जित तथा एक खेल वर्षाको कारण रोकिएपछि रनरेटको आधारमा फाईनल भिडन्त पक्का गरेका हुन । नरेनापुर क्रिकेट खेलमैदानमा बुधबार भएको निर्णायक खेलमा न्यू होराईजनले ब्याटिङकै क्रममा वर्षाले खेल अवरुद्ध भएको हो ।

यसैगरि विहान भएको पहिलो खेलमा गोलपार्क क्रिकेट क्लब विजयी भएको छ । बुटवल उपमहानगरपालिकाको सहयोग तथा बुटवल क्रिकेट विकास समितिको आयोजनामा बुधबार भएको खेलमा गोलपार्कले बुटवल ईलाभेन क्रिकेट क्लबलाई १ बिकेटले पराजित गरेको हो । टस जितेर बुटवल ईलाभेनले ब्याटिङ रोज्दै २० ओभरमा ८ बिकेटको नोक्सानीमा १३६ रन बनायो । उसका लागि ओपनर सुमन पाण्डेले ४४ बलमा ४३ तथा युवराज सेनले १७ बलमा ३१ रनको योगदान दिए । गोलपार्कका सजन खनाल, सन्देश पन्थी र आशुतोष भोगटीले समान २–२ बिकेट लिए । मध्यम लक्ष्य पछ्याएको गोलपार्क २० ओभरमा ९ बिकेटको नोक्सानीमा लक्ष्य भेटायो । गोलपार्कको जितमा सन्देश पन्थी नायक रहे । उनले ब्याटिङतर्फ अर्धशतक पुरा गर्नुको साथै बलिङमा २ बिकेट लिएर अलराउण्डर खेल प्रदर्शन गरे । खेलमा उनले ५८ बलमा ५९ रन बनाए । बिकल अधिकारीले २८ रन जोडे । बुटवल ईलाभेनका विपिन भट्टराई र शिव कुमार मौर्यले समान ३–३ तथा सुमन पाण्डेले २ बिकेट लिए । खेलमा गोलपार्कका सन्देश पन्थी प्लेयर अफ दी म्याचबाट पुरस्कृत भए ।

प्रतियोगितामा न्यु होराईजन क्लब, वेष्ट्रन क्रिकेट क्लब, गोलपार्क क्रिकेट क्लब, बुटवल ईलाभेन क्रिकेट क्लब, जेआर क्रिकेट क्लब, बुटवल युथ गरि ६ टिम सहभागी रहेको छ । गतवर्ष बेष्ट्रन क्रिकेट एकेडेमी विजेता र न्यु होराईजन क्लब उपविजेता रहेको खेल संयोजक राजु रानाले बताए ।

प्रतियोगिताको उपाधि विजेताले नगद ३५ हजार, कप, मेडल, प्रमाणपत्र तथा उपविजेताले नगद १५ हजार, कप, मेडल, प्रमाणपत्रबाट पुरस्कृत गरिने संघका सहसचिव आयुष बोगटीले बताए । यसैगरि प्रतियोगितामा म्यान अफ दी सिरिज ३५००, कप, मेडल, प्रमाणपत्र, उत्कृष्ट बलर, ब्याट्सम्यानलाई नगद २५०० रुपैया, कप, मेडल, प्रमाणपत्रबाट पुरस्कृत गरिने उनले बताए ।