खोज

कपिलवस्तु, ०३ असार । 

कपिलवस्तुको तौलिहवामा गत जेठ २० गते मापदण्ड भन्दा कम पेट्रोलियम पदार्थ बिक्री वितरण गरेको भेटिदा सिल गरिएका दुई पेट्रोल पम्प हदै सम्मको कारबाही पछि पुनः सञ्चालनमा आएका छन् ।  जिल्ला प्रशासन कार्यालय कपिलवस्तु र गुणस्तर तथा नाप तौल कार्यालय बुटवलको संयुक्त अनुगमन टोलीले चार वटा पेट्रोल पम्प अनुगमनका क्रममा कैफियत भेटिएका दुई पेट्रोल पम्पको नोजल सिल गरेको थियो ।

मापदण्ड भन्दा कम मात्रामा इन्धन बिक्री गर्ने कपिलवस्तु नगरपालिका वडा नम्बर २ स्थित जमुवारटोलको उमा ट्रेडिड्ड कम्पनीको २ वटा पेट्रोल मेसिन र १ वटा डिजेल मेसिन तथा वडा नम्बर ४ कोदहवाको ओझा फिलिगं सेन्टरको १ वटा पेट्रोल मेसिन र १ वटा डिजेल मेसिनमा मापदण्ड भन्दा कम मात्रामा इन्धन भेटिए पछि टोलीले सिल गरेको पेट्रोल पम्पले तोकिएको जरिवाना तिरे सँगै अनुगमन पश्चात् प्राविधिक सहितको टोलीले मापदण्ड अनुकूलको मात्रा यकिन गरेसँगै पुनः सञ्चालन गरिएको हो ।

गत जेठ २० गते चार वटा पेट्रोल पम्प अनुगमनका क्रममा डिजेल तथा पेट्रोल मापदण्ड भन्दा कम बिक्री वितरण गरेको भेटिएकाले नोजल सिलबन्दी गरिएकोमा दुवै पेट्रोल पम्पलाई स्टयान्डर नाप र तौल ऐन २०२५ को दफा ३० को १ को (ङ) को बिर्खिलाफ पाइएकोले ऐन अनुसार दुवै पम्पलाई हदै सम्मको कारबाही अनुसार १/१ लाख रुपैयाँ  कारबाही स्वरूप जरिवाना गरिएको गुणस्तर तथा नाप तौल कार्यालय बुटवलका निरीक्षक नीराजन पुडासैनीले जानकारी दिए ।

कम्पनीको आधिकारिक प्राविधिकले उक्त मेसिनरी मर्मत गरे पश्चात् परीक्षणका क्रममा मापदण्ड अनुसार पाइएकोले बिक्री वितरण खुला गरिएको उनले जानकारी दिए । कारबाही पछि अनुगमनका क्रममा पम्प मर्मत पश्चात् दुवै पेट्रोल पम्पमा मापदण्ड अनुसार ठिक मात्रा दिएको देखिएकाले बिक्री वितरणको लागि सुचारु गरिएको जनाउँदै अनुगमन निरन्तर गरी त्रुटि भेटिए थप कारबाही गरिने कपिलवस्तुका सहायक प्रमुख जिल्ला अधिकारी पदमलाल लामिछानेले बताए ।