खोज

काठमाडौं, २ असार ।

राष्ट्रिय जनमोर्चाका अध्यक्ष चित्रबहादुर केसीले आगामी आर्थिक वर्ष २०८२/०८३ को बजेटलाई कडा शब्दमा आलोचना गरेका छन्। सोमबार प्रतिनिधिसभाको बैठकमा बोल्दै उनले बजेटलाई “कागलाई बेल पाक्यो, हर्ष न विस्मात” भन्ने उखानसँग तुलना गर्दै आम नेपाली जनताको पक्षमा नभएको टिप्पणी गरे।

उनले प्रत्येक वर्ष लाखौं नेपाली युवा श्रम बजारमा प्रवेश गरे पनि रोजगारी सिर्जना गर्ने योजना बजेटमा समावेश नभएको बताए। रोजगारी सिर्जना गर्न सक्ने मुख्य क्षेत्र कृषि भए पनि अझै पनि सामन्ती भूस्वामित्व कायम रहेको, किसानभन्दा भूमाफिया पोस्ने गरी नीति बनाइएको आरोप लगाए।

केसीका अनुसार, दुध र मासुमा मुलुक केही हदसम्म आत्मनिर्भर बन्दै गर्दा पनि सरकारी नीतिले आयात बढाएर स्वदेशी उत्पादनमाथि प्रहार गर्ने प्रयास गरिरहेको छ। यसले दीर्घकालमा कृषि प्रणाली नै ध्वस्त पार्ने खतरा रहेको उनको भनाइ छ।

उनले भने, “बजेट यस्तो छ, जसको स्वामित्व आम नेपाली जनताले लिन सक्दैनन्। बजेट मुठीभरका थैली शाह वर्गका लागि बनेको हो भन्ने देखिन्छ।” देशमा रहेका उद्योगहरू निजीकरण गरिँदै गर्दा सरकारले नयाँ उद्योग खोल्ने नीति छाडेको उल्लेख गर्दै उनले औद्योगिक क्षेत्रमा रोजगारी सिर्जना गर्ने आधार नै हराएको बताए।

अध्यक्ष केसीले वैदेशिक रोजगारीलाई राज्यले योजना नभएर लाचारीका रूपमा रोजेको जिकिर गरे। उनले भने, “हामीसँग एउटै उपाय बाँकी छ— कमिशन खाएर युवाहरू विदेश पठाउने, अनि तिनले पठाएको रेमिट्यान्सबाट संसद र सरकार चलाउने।”

छलफलमा भाग लिनुको उद्देश्य संशोधनको आशामा नभई बजेटको वास्तविकता जनसमक्ष पुर्‍याउने रहेको उनले स्पष्ट गरे। “बजेट प्रस्तुत हुँदा मनमा प्रश्न उठ्छ— छलफलमा भाग लिउँ कि नलिउँ। सरकार संशोधन गर्दैन भन्ने थाहा हुँदाहुँदै म जनताका लागि यो रोष्ट्रममा उभिएको हुँ,” उनले भने।