खोज

बुटवल, १ असार । सेवा प्रवाहलाई थप प्रभावकारी र व्यवस्थित बनाउन माग गर्दै नेकपा एमाले बुटवल नगर कमिटीले आइतबार ईलाका प्रशासन कार्यालय बुटवललाई ज्ञापनपत्र बुझाएको छ । नगर कमिटी अध्यक्ष शोभाखर पोखरेलको नेतृत्वमा गएको प्रतिनिधि टोलीले बढ्दो गर्मी र सेवाग्राहीको भीडका कारण जनताले भोग्नुपरेको सास्तीप्रति गम्भीर ध्यानाकर्षण गराउँदै कार्यालयको सेवा बिहान ७ बजेदेखि नै सुरु गर्न माग गरेको हो ।

ज्ञापनपत्रमा उल्लेख गरिएको छ कि नागरिकता र राष्ट्रिय परिचयपत्र बनाउने सेवामा अत्यधिक चाप छ, जसका कारण सेवाग्राहीहरू बिहान ६ बजेदेखि नै लाइनमा बस्न बाध्य छन्। यस्तो अवस्थाले आम जनतालाई असहज भएको भन्दै सेवा समयलाई अगाडि सारे छिटो, छरितो र जनमैत्री सेवा प्रवाहको वातावरण बनाउन माग गरिएको छ ।

ज्ञापनपत्र बुझेपछि ईलाका प्रशासन कार्यालय बुटवलका प्रमुख रामचन्द्र अर्यालले सेवाग्राहीको अत्यधिक चापका कारण सेवा प्रवाहमा समस्या देखिएको स्वीकार गर्दै कार्यालयले उपलब्ध जनशक्ति र उपकरणको अभावबीच सेवामा जुटिरहेको जानकारी दिए । प्रमुख अर्यालका अनुसार बुटवल उपमहानगरपालिकासँग समन्वय गरेर थप सेवा केन्द्र स्थापना गर्न अनुरोध गरिएको बताए । उनले पालिकातर्फबाट थप केन्द्र स्थापनाको तयारी भइरहेको संकेत समेत गरे ।

राष्ट्रिय परिचयपत्र अनिवार्य बनाइएकाले सबै सरकारी सेवा लिन चाहने नागरिकहरू कार्यालय धाउने क्रम बढेको, तर सोही अनुपातमा सेवा व्यवस्थापन गर्न चुनौती भएको कार्यालय पक्षको भनाइ छ ।