खोज

काठमाडौँ ।

नेकपा माओवादी केन्द्रका उपमहासचिव वर्षमान पुनले राष्ट्रिय स्वतन्त्र पार्टी (रास्वपा)सँगको सहकार्य सम्झना गरेका छन्। रास्वपाको नाराबाजीबीच प्रतिनिधिसभामा बजेटमाथिको सामान्य छलफल भइरहेका बेला पुनले केही दिनअघि संसद्मा संघर्षरत बेला रास्वपासँग मिलेर काम गरेको स्मरण गराए।

त्रिभुवन अन्तर्राष्ट्रिय विमानस्थलको अध्यागमन कार्यालय र भिजिट भिसा प्रकरण संसद्मा जेठ १३ गतेदेखि उठ्न थालेको छ। यस विषयलाई संसद्मा ल्याउन प्रतिपक्षी दलहरू—माओवादी केन्द्र, रास्वपा लगायत—ले सक्रिय भूमिका खेलेका थिए। माओवादीका उपमहासचिव पुनले भने, “सत्तापक्षसँग निरन्तर संवाद र जनताको सुझावका आधारमा सरकारले भिजिट भिसा प्रकरणमा छानबिन गर्ने प्रतिबद्धता जनाएको छ, त्यसपछि हामी सदन सञ्चालनमा तयार छौं।”

उनले गृहमन्त्रीको राजीनामा माग्ने कुरा नैतिकताको विषय भएको बताउँदै यो व्यक्तिगत विषय भएको र पार्टी र जनताले सुझाव दिन सक्ने बताएका छन्। गृहमन्त्रीले राजीनामा नदिए पनि छानबिनमा सहकार्य गर्ने प्रतिवद्धता जनाएपछि माओवादी केन्द्र सदन सञ्चालनमा सहमत भएको पुनले बताए।

पुनले रास्वपालाई पनि सहकार्य गर्न आग्रह गरे। उनले मुख्य विषय भिजिट भिसा प्रकरणको निष्पक्ष छानबिन हुनु पर्ने र अख्तियार आयोगले छानबिनलाई उचित तरिकाले अघि बढाउने विश्वास व्यक्त गरे।

केहीले माओवादी तर्सिएको आरोप लगाएको विषयमा उनले त्यसमा सत्यता नभएको र छानबिन र अध्ययनको काम जारी रहने बताए। उनले अग्नि सापकोटा विरुद्धको मुद्दासँग सदन सञ्चालनको कुनै सम्बन्ध नभएको स्पष्ट पारे।

माओवादी उपमहासचिव पुनले रास्वपालाई नयाँ दल भए पनि अनुभवसहित अघि बढ्नुपर्ने बताएका छन्। साथै, सत्तापक्षका सांसदहरूले संयमित व्यवहार गर्नुपर्ने भन्दै उनले “प्रतिकूलता भए पनि जबरजस्ती गर्न नहुने” बताएका छन्।

उनले संसदीय अंकगणित परिवर्तनशील हुने भएकाले पुराना प्रतिस्पर्धा तत्काल मेट्नु नमिल्ने बताए। पुनले सभामुखलाई संवादको वातावरण बनाउन थप पहल गर्न अनुरोध गर्दै रास्वपालाई पनि बजेटमाथि धारणा राख्न प्रोत्साहित गर्न आग्रह गरे। उनले प्रधानमन्त्री केपी शर्मा ओली र नेपाली कांग्रेस सभापति शेरबहादुर देउवालाई पनि यसका लागि पहल गर्न सुझाव दिए।