लमही ,१ असार ।
लुम्बिनी प्रदेश सरकारले आगामी आर्थिक वर्ष २०८२र८३ का लागि ल्याउन लागेको वार्षिक बजेट अन्तिम चरणमा आएर अस्तव्यस्त बन्दै गएको छ। मुख्यमन्त्री र अर्थमन्त्रीको बिचमा बजेटको संरचना र नीति सुदृढ गर्न नसकिएको अवस्थामा बजेट निर्माण प्रक्रिया पेचिलो बनेको हो।
अहिले पनि बजेटमा नयाँ योजना थप्ने प्रयास जारी रहेको स्रोतले जनाएको छ। दिउँसो ३ बजे बस्ने भनिएको प्रदेशसभा बैठक ५ बजे सारिएको छ। बैठक सारिनुको कारण अन्तिम समयमा मन्त्री तथा प्रदेशसभा सदस्यहरूको दबाबमा योजनाहरू समावेश गर्नुपर्ने अवस्था सिर्जना भएको बताइएको छ।
सरकारको प्रारम्भिक योजना अनुसार यसपालि ३२ अर्ब हाराहारीको बजेट ल्याउने भनिए पनि अन्तिम घडीमा बजेटको आकार बढाएर करिब ४२ अर्ब पुर्याउन लागिएको छ। चालु आर्थिक वर्षको बजेट ३८ अर्ब ९७ करोड रुपैयाँ रहेको थियो।
मुख्यमन्त्री चेतनारायण आचार्यले ऋणात्मक बजेट नल्याउने र टुक्रे योजना समावेश नगर्ने भनिए पनि पछिल्लो समय त्यो प्रतिबद्धता पछि हट्दै गएको देखिएको छ। स्रोतविहीन योजनाको सूची लामो बनाउँदै गर्दा बजेटको आकार त बढेको छ, तर कार्यान्वयनको यथार्थमा भने प्रश्न चिह्न खडा भएको छ।
अन्तिम कसरतका बाबजुद पनि बजेटबारे राजनीतिक सहमति खोज्ने प्रयास भइरहेको र बजेट समयमै ल्याउन सरकार दबाबमा परेको जनाइएको छ।
२३ मंसिर २०८२, मंगलवार
