खोज

लमही ,३१ जेठ ।

लुम्बिनी प्रदेशका मुख्यमन्त्री चेतनारायण आचार्यले सरकारले आगामी आर्थिक वर्षको बजेट नीति तथा कार्यक्रमको जगमा उभिएर ल्याउने तयारी गरेको बताएका छन्। उनले यो बजेटले समग्र लुम्बिनी प्रदेशको समृद्धि र विकासमा योगदान पुर्‍याउने विश्वास व्यक्त गरेका छन।

प्रदेश सरकारले आगामी आर्थिक वर्ष २०८२/०८३ का लागि तयार गरेको बजेट आइतबार दिउँसो ३ बजे प्रदेश सभाको तेह्रौं बैठकमा सार्वजनिक हुँदैछ। प्रदेश सभा सचिवालयद्वारा सार्वजनिक सम्भावित कार्यसूचीअनुसार आर्थिक मामिला तथा योजना मन्त्री धनेन्द्र कार्कीले राजस्व र व्ययको वार्षिक अनुमान प्रस्तुत गर्ने छन।

मुख्यमन्त्री आचार्यका अनुसार बजेटमा कृषि, उद्योग, पर्यटन, पूर्वाधार, शिक्षा, स्वास्थ्य, रोजगारी लगायतका क्षेत्रलाई प्राथमिकतामा राखिएको छ। नीति तथा कार्यक्रममार्फत अघि सारिएको योजनालाई बजेटमार्फत कार्यान्वयनमा लैजाने स्पष्ट संकेत सरकारको रहेको छ।

चालु आर्थिक वर्षमा ३८ अर्ब ९७ करोड रुपैयाँको बजेट ल्याएको लुम्बिनी प्रदेश सरकारले आगामी वर्षको बजेटको आकार केही घटाएर ल्याउने तयारी गरेको छ। खर्चको प्रभावकारिता, प्राथमिकताको स्पष्टता र परिणाममुखी योजना कार्यान्वयनमा जोड दिइने बताइएको छ।

मुख्यमन्त्री आचार्यको भनाइले स्पष्ट संकेत गर्छ— प्रदेश सरकार अब सस्तो लोकप्रियता होइन, कार्यान्वयन क्षमता र स्थायीत्वपूर्ण विकासमा केन्द्रित छ। बजेट नीति तथा कार्यक्रममा आधारित हुने कुरा आफैंमा सरकारको जिम्मेवार व्यवहारको संकेत मानिएको छ।