खोज

काठमाडौं ।

प्रतिनिधि सभाको बैठक आज दिउँसो १ बजेका लागि बोलाइएको छ। जेठ १३ गतेदेखि विपक्षी दलहरुको विरोधका कारण प्रभावित हुँदै आएको संसद् बैठक आज फेरि बस्न लागेपनि राजनीतिक गतिरोध अझै अन्त्य हुन सकेको छैन।

भिजिट भिसा प्रकरणमा गृहमन्त्री रमेश लेखकको राजीनामाको माग गर्दै माओवादी केन्द्र, रास्वपा लगायतका विपक्षी दलहरुले संसद् अवरुद्ध गर्दै आएका छन्। यद्यपि, बजेट प्रस्तुत गरिएको जेठ १५ गतेको बैठक अपवाद थियो। त्यसपछिका सबै बैठकहरू प्रतिपक्षीको अवरोधकै बीचमा रोकिँदै आएका छन्।

पछिल्लो समय विपक्षी दलहरूले गृहमन्त्रीको राजीनामाको अडानबाट पछि हटेर प्रकरणमा छानबिन समिति गठनको माग गर्दै आएका छन्। तर सत्ता पक्ष तयार नहुँदा सहमति बन्न सकेको छैन, जसले गर्दा बजेटमाथिको छलफल सुरु गर्न पनि ढिलाइ भएको छ।

यता सत्तारूढ दलहरू — नेपाली कांग्रेस र नेकपा एमाले — पछिल्ला वार्ताहरूमा छानबिन समिति गठनमा लचक देखिएका छन् र सार्वजनिक रूपमा प्रतिबद्धता पनि जनाएका छन्। तर समितिको स्वरूप र कार्यादेशबारे सहमति नजुट्दा संसद्को गतिरोध कायमै छ।

माओवादी केन्द्रका अध्यक्ष पुष्पकमल दाहाल ‘प्रचण्ड’ले विहीबार पत्रकारहरूसँग कुरा गर्दै सहमति नजिक पुगेको बताएका थिए। पार्टीका अर्का नेता माधव सापकोटाले पनि सत्तापक्षको प्रस्ताव हेरेर मात्र संसद् सञ्चालनबारे निर्णय लिइने जनाए।

यदि आजको बैठकमा सहमति कायम भई संसद अवरोध हटेमा, सभामुख देवराज घिमिरेले प्रधानमन्त्री तथा मन्त्रिपरिषद्को कार्यालयबाट प्राप्त कार्यभारसम्बन्धी पत्रहरू पढेर सुनाउनेछन्। त्यस्तै, अर्थमन्त्री विष्णुप्रसाद पौडेलले आर्थिक वर्ष २०८२/८३ को बजेटमाथि सामान्य छलफल सुरु गर्न प्रस्ताव पेस गर्ने कार्यसूची छ। साथै, संघीय निजामती सेवा विधेयकसम्बन्धी प्रतिवेदन पनि राज्य व्यवस्था तथा सुशासन समितिबाट पेस हुने सम्भावना रहेको छ। संसद् सुचारु हुने कि फेरि अवरुद्ध हुने भन्ने कुरा आज सत्तापक्ष र विपक्षीबीचको अन्तिम सहमतिमा निर्भर रहने देखिन्छ।