खोज

काठमाडौं ।

गृहमन्त्री रमेश लेखकले भिजिट भिसा प्रकरणमा आफूको कुनै संलग्नता नरहेको दाबी गर्दै, आफूविरुद्ध नियोजित रूपमा राजनीतिक षड्यन्त्र रचिएको आरोप लगाएका छन्। शुक्रबारको प्रतिनिधिसभा बैठकमा रास्वपा र राप्रपाका सांसदहरूको विरोधबीच बोल्ने अवसर पाएका मन्त्री लेखकले आफूलाई बदनाम गर्न सुनियोजित प्रयास भएको बताएका हुन्।

“पत्रपत्रिका, सामाजिक सञ्जाल र केही माननीयहरूबाट उठाइएका प्रश्नहरूमा सार्वभौमसत्ता सम्पन्न संसदमा जवाफ दिन उपयुक्त ठानेर म उपस्थित भएको हुँ,” उनले भने, “राजनीतिक जीवनमा पारदर्शिता राख्दै आएको छु, र यस विषयमा मेरो संलग्नता कदापि छैन।”

लेखकले त्रिभुवन अन्तर्राष्ट्रिय विमानस्थलको अध्यागमन कार्यालयका प्रमुख तीर्थराज भट्टराईलाई अख्तियारले बयानका लागि बोलाएको कुरा पनि सञ्चारमाध्यमबाट मात्रै थाहा भएको दाबी गरे। “संबद्ध निकाय छानबिन गरिरहेका छन्, त्यसमा सरकारलाई जोड्नु अनुचित छ,” उनले भने।

त्यसक्रममा उनले संसदमा प्रश्न उठाउनु स्वाभाविक भए पनि मुद्दा संवैधानिक निकायको अनुसन्धानाधीन रहँदा सरकारलाई दोषारोपण गर्नु गलत हुने बताए। साथै, विगतमा यस्ता मुद्दामा अन्य मन्त्रीहरूले संसदमा जवाफ दिएका थिए कि थिएनन् भनेर प्रतिप्रश्नसमेत गरे।

गृहमन्त्रीले यो सम्पूर्ण घटनालाई आफ्नो राजनीतिक छवि र भविष्य समाप्त पार्ने उद्देश्यले रचिएको षड्यन्त्रको हिस्सा भएको दाबी गरे। उनका अनुसार भिजिट भिसा प्रकरणमा आफूलाई जोड्ने कुनै प्रमाण छैन, र त्यसबारे सत्यतथ्य बाहिर आउनेमा आफू विश्वस्त छन्।