खोज

काठमाडौँ ।

आईसीसी विश्व टेस्ट च्याम्पियनशिपको फाइनल खेलको पहिलो दिन लड्र्स क्रिकेट मैदानमा अष्ट्रेलियाले निराशाजनक प्रदर्शन गर्दै मात्र २१२ रनमै समेटिएको छ। टस जितेर दक्षिण अफ्रिकाले फिल्डिङ रोजेपछि ब्याटिङमा उत्रिएको अष्ट्रेलियाको इनिङ्स लामो समय टिक्न सकेन। टोलीका लागि ब्यू वेबस्टरले ७२ रन र अनुभवी स्टीवन स्मिथले ६६ रनको योगदान दिए पनि अन्य ब्याटरहरू खासै चल्न सकेनन्।

दक्षिण अफ्रिकाका तर्फबाट कागिसो रबाडा चम्किए, जसले पाँच विकेट लिए। उनले उत्कृष्ट लयमा बलिङ गर्दै अष्ट्रेलियाको मध्यक्रम तहसनहस बनाए। त्यस्तै, मार्को जानसेनले तीन विकेट लिए भने केशव महाराज र एडेन माक्र्रमले समान एक-एक विकेट हात पारे।

बल्लेबाजीमा उत्रिएको दक्षिण अफ्रिकाले पनि राम्रो सुरुवात गर्न सकेन। दिनको खेल समाप्त हुँदासम्म उसले चार विकेट गुमाएर ४३ रन मात्रै जोड्न सक्यो। ओपनर रायन रिकेल्टनले १६ रन बनाएर आउट भए। कप्तान टेम्बा बाभुमा तीन रनमा खेलिरहेका छन् भने डेभिड बेडिङघम आठ रनमा अविजित छन्।

अस्ट्रेलियाका बलरहरू पनि प्रभावशाली रहे। मिचेल स्टार्कले दुई विकेट लिए भने जोश हेजलवुड र प्याट कमिन्सले समान एक-एक विकेट लिए।

यो फाइनलमा स्थान बनाउन अस्ट्रेलियाले ६७.५४ प्रतिशत अंक हासिल गरेको थियो भने दक्षिण अफ्रिकाले ६९.४४ प्रतिशत। प्रतियोगिताको विजेताले ३.६ मिलियन अमेरिकी डलर र उपविजेताले २.१६ मिलियन अमेरिकी डलर पुरस्कार प्राप्त गर्नेछ।

विश्व टेस्ट च्याम्पियनशिप सन् २०१९ मा सुरु भएको हो। पहिलो संस्करण न्यूजिल्यान्डले जितेको थियो भने दोस्रो संस्करणमा अस्ट्रेलिया विजेता बनेको थियो। दुर्भाग्यवश, दुवै पटक भारत उपविजेता बन्न पुग्यो।

यसपटक दक्षिण अफ्रिका र अस्ट्रेलियाबीचको भिडन्त कसले जित्ने हो, त्यो भने आउँदा दिनमा टुंगिनेछ।