खोज

काठमाडौँ ।

परराष्ट्रमन्त्री डा. आरजु राणा देउवाले नेपाल–भारत सम्बन्धलाई नयाँ उचाइमा लैजानका लागि व्यापार, पारवहन, लगानी र कनेक्टिभिटीलाई प्राथमिकता दिनुपर्नेमा जोड दिएकी छिन्।

नेपाल–भारत रणनीतिक संवाद कार्यक्रमको उद्घाटन गर्दै मन्त्री राणाले दुई देशबीचको सम्बन्धलाई “साझा समृद्धिको सहयात्रा” बनाउने बेला आएको बताइन्। उनले भनिन्, “अब समय आएको छ, जहाँ नेपाली किसानको अदुवा २४ घण्टामै मुम्बई पुग्नेछ र दिल्लीमा बैठक सकेको भारतीय पर्यटक साँझ पोखरा झर्नेछ।”

उनले पारस्परिक सम्पर्क सञ्जाललाई सडक, रेलवे, जलमार्ग, हवाई मार्गदेखि डिजिटल पूर्वाधारसम्म विस्तार गर्नुपर्ने आवश्यकता औंल्याइन्। उनका अनुसार यस्ता पूर्वाधारले क्षेत्रीय र विश्व आपूर्ति शृंखलासमेत बलियो बनाउनेछन्, जसले पारवहन व्यापार र सीमा अर्थतन्त्रलाई पनि स्तरीकरण गर्नेछ।

मन्त्री राणाले दुई देशका नागरिकबीच गहिरो सामाजिक, सांस्कृतिक र भावनात्मक सम्बन्ध रहेका कारण सहयोग, सहकार्य र कनेक्टिभिटीलाई अझ सुदृढ बनाउनुपर्ने बताइन्।

उनले विशेष रूपमा ऊर्जा क्षेत्रमा उल्लेखनीय प्रगति भएको उल्लेख गर्दै भनिन्, “आगामी दशकमा भारतले नेपालबाट १० हजार मेगावाट विद्युत् आयात गर्ने प्रतिबद्धता जनाएको छ, यो हाम्रो ऊर्जा साझेदारीको स्पष्ट संकेत हो।”

डिजिटल प्रविधि र नवप्रवर्तनतर्फ संकेत गर्दै उनले नेपाल–भारतबीच टेक्नोलोजी स्टार्टअप, नवप्रवर्तन प्लेटफर्म र सीप विकासमा सहकार्य बढाउनुपर्नेमा जोड दिइन्। “हाम्रा युवाहरूलाई प्रविधिको माध्यमबाट सँगै काम गर्ने वातावरण बनाउनु अहिलेको आवश्यकता हो,” उनले भनिन्।

कार्यक्रममा मन्त्री राणाले भारतको प्राविधिक क्षमता र नेपालको युवा जनशक्तिको मिलनले साझा समृद्धिको ढोका खोल्ने विश्वास व्यक्त गरिन्।