पोखरा ।
पोखरामा बुधबार ल्यान्डिङ गर्ने क्रममा दुईवटा प्याराग्लाइडिङ फेवा तालमा खस्ने घटना भएको छ। पोखरा महानगरपालिका–१८ तोरेपानीबाट उडेका प्याराग्लाइडिङहरू ल्यान्डिङको बेला अनियन्त्रित भई तालको बीच भागमा खसेका हुन्।
दुर्घटना लगत्तै सशस्त्र प्रहरी बल नेपाल नं. २४ कालिका गण कास्कीबाट फेवा रेस्क्यु टावरमा तैनाथ सुरक्षाकर्मीले चार जनालाई दिउँसो करिब ३ बजे सकुशल उद्धार गरेका छन्।
उद्धार गरिएका व्यक्तिहरूमा भारतको बनारसका ४१ वर्षीय अकलेस यादव र ३५ वर्षीय चन्दनकुमार पटेल रहेका छन्। उनीहरू पर्यटकका रूपमा पोखरा आएका थिए। साथै दुर्घटनामा परेका अग्नि प्याराग्लाइडिङका पाइलट ३० वर्षीय मिलन शाह र ह्याप्पी फ्लाई प्याराग्लाइडिङका पाइलट २८ वर्षीय विश्वास अधिकारी पनि सकुशल उद्धार गरिएका छन्। सशस्त्र प्रहरीले सबैको स्वास्थ्य अवस्था सामान्य रहेको जनाएको छ। दुर्घटनाको कारण भने खुलाइएको छैन।
