खोज

काठमाडौँ ।

नेपाल राष्ट्र बैंकले बुधबार ४० अर्ब रुपैयाँ बराबरको तरलता खिच्ने योजना बनाएको छ, जसले अल्पकालीन ब्याजदर बढाउने अपेक्षा गरिएको छ। केन्द्रीय बैंकले अन्तर बैंक ब्याजदर साढे २ प्रतिशतसम्म झरेपछि निक्षेप संकलन उपकरण प्रयोग गर्दै वित्तीय प्रणालीमा तरलता सन्तुलनमा ल्याउने काम गर्दैछ। पछिल्लो समय कर्जाको माग कमजोर रहँदा र रेमिट्यान्सको निरन्तर बृद्धि हुँदा वित्तीय प्रणालीमा अधिक तरलताको समस्या झनै बढ्दै गएको छ।

राष्ट्र बैंकले ब्याजदर करिडोरमार्फत अल्पकालीन ब्याजदरलाई सन्तुलित बनाउँदै आएको छ। वित्तीय प्रणालीमा तरलता अभाव हुँदा स्थायी तरलता सुविधा मार्फत बैंकदर ६.५ प्रतिशतमा पैसा उपलब्ध गराइन्छ भने अधिक तरलता हुँदा स्थायी निक्षेप सुविधामार्फत तरलता खिचिन्छ, जसको दर ३ प्रतिशत तोकिएको छ। अन्तर बैंक ब्याजदर ३ प्रतिशतभन्दा तल झरेपछि राष्ट्र बैंकले यस साताको आइतबार ४२ दिने निक्षेप संकलन गरेको थियो र बुधबार पुनः ४० अर्ब निक्षेप बोलकबोल गर्ने तयारीमा छ।

बुधबार जेठ ७ गते लिएको ५० अर्ब निक्षेपको अवधि सकिन लाग्दा र स्थायी निक्षेप मार्फत लिएको रकम परिपक्क हुँदै गर्दा नयाँ ४० अर्ब निक्षेप संकलन आह्वान गरिएको हो। निक्षेप संकलनबाट तरलता घटेपछि बैंक तथा वित्तीय संस्थाहरूले उच्च ब्याजदर माग गर्न थाल्छन्, जसले ब्याजदर बढ्ने सम्भावना ल्याउँछ। यसै साताको आइतबार जारी निक्षेप संकलन उपकरणको औसत ब्याजदर २.९९३५ प्रतिशत कायम रहेको केन्द्रीय बैंकले जनाएको छ।

वित्तीय प्रणालीमा अधिक तरलता भएपछि बुधबारसम्म बैंक तथा वित्तीय संस्थाहरूले राष्ट्र बैंकमा जम्मा गरेको रकम ३ खर्ब ९७ अर्ब रुपैयाँ पुगेको छ, जसमा २ खर्ब ५५ अर्ब निक्षेप संकलन र एक खर्ब ४१ अर्ब स्थायी निक्षेप संकलन रहेको छ।