खोज

काठमाडौँ ।

नेकपा एमालेको विद्यार्थी संगठन अनेरास्ववियुको महाधिवेशनमा नेतृत्व चयनका लागि सहमतिको प्रयास असफल भएपछि निर्वाचन प्रक्रिया अघि बढेको छ। निर्वाचन समितिले उम्मेदवारहरूको कागजात र उमेर परीक्षण सुरु गरेसँगै मतदान प्रक्रिया थालिएको हो।

निर्वाचन तालिकाअनुसार आज बिहान १० बजेबाट मतदान सुरु हुने भनिए पनि कागजात रुजु र उमेर परीक्षण प्रक्रियाका कारण ढिलाइ भएको हो। अनेरास्ववियुमा उमेर सीमा ३२ वर्ष तोकिएकाले निवर्तमान चार उपाध्यक्ष र एक महासचिव उमेर हदका कारण उम्मेदवार बन्न पाएनन्। यसले नयाँ पुस्ताबाट नेतृत्व चयनको बाटो खुलेको छ।

अध्यक्ष पदमा डा. सुजन कडरिया र प्रकाश पौडेलबीच प्रतिस्पर्धा भइरहेको छ। अध्यक्ष मण्डलले कडरियालाई अध्यक्ष र पौडेललाई उपाध्यक्षमा प्रस्ताव गरे पनि पौडेल पक्षले विरोध जनाउँदै निर्वाचनको माग गरेपछि चुनावी प्रक्रिया अघि बढाइएको हो।

उपाध्यक्षमा खुला तर्फ पाँच र महिला तर्फ चार जनाले उम्मेदवारी दिएका छन्। खुलातर्फ भरत धामी, धर्मेन्द्र केसी, विकास श्रेष्ठ, राजकुमार ढकाल, र रोहित बम प्रतिस्पर्धामा छन् भने महिला उपाध्यक्षका लागि अञ्जना शिवाकोटी, आरती भट्टराई, सुनिता धिताल र भवानी बजगाईं उम्मेदवार छन्।

महासचिव पदमा तीन जना—दीपक धामी, आरके रोमस र सुनिल कँडेल—बीच प्रतिस्पर्धा हुँदैछ। कडरिया र धामी एउटै प्यानलबाट अध्यक्ष र महासचिवका उम्मेदवार बनेका हुन्।

त्यस्तै उपमहासचिवमा कमल जोशी, अमर शाही र प्रेमिका शाही प्रतिस्पर्धी छन्। सचिव पदमा भने मदन भण्डारी, राजेश ओली, रक्षा बम, मनोज राई, गोपाल नेपाल, धर्मराज तिमिल्सेना, अनुप लामिछाने, स्मृति बराल, रेखा न्यौपाने, नीरज पौडेल लगायतका उम्मेदवार मैदानमा छन्।

निर्वाचन प्रक्रिया सम्पन्न भएपछि आजै विद्युतीय मतदान प्रणालीमार्फत परिणाम सार्वजनिक गरिने बताइएको छ।