काठमाडौं ।
चालु आर्थिक वर्षको वैशाख महिनासम्म आइपुग्दा बैंक तथा वित्तीय संस्थाबाट निजी क्षेत्रलाई प्रवाहित कर्जा ३ खर्ब ६८ अर्ब ६८ करोड रुपैयाँले बढेको छ। यो वृद्धि अघिल्लो आर्थिक वर्षको सोही अवधिको तुलनामा ७.३ प्रतिशतले बढी हो। गत वर्षको सोही अवधिमा कर्जा प्रवाह २ खर्ब २५ अर्ब २४ करोडले मात्र बढेको थियो, जसको वृद्धिदर ४.७ प्रतिशत थियो।
नेपाल राष्ट्र बैंकका अनुसार, वार्षिक बिन्दुगत आधारमा २०८२ सालको वैशाख मसान्तसम्ममा निजी क्षेत्रमा प्रवाहित कर्जा ८.४ प्रतिशतले बढेको छ। त्यस अवधिसम्म गैरवित्तीय संस्थागत क्षेत्रतर्फ ६३.१ प्रतिशत र व्यक्तिगत तथा घरपरिवार क्षेत्रतर्फ ३६.९ प्रतिशत कर्जा प्रवाहित भएको देखिएको छ। यो अंश अघिल्लो वर्ष क्रमशः ६३.७ र ३६.३ प्रतिशत थियो।
बैंकिङ संस्थाहरूको हिसाबले हेर्दा, वाणिज्य बैंकहरूले चालु आर्थिक वर्षका १० महिनामा कर्जा प्रवाह ७.६ प्रतिशतले बढाएका छन्। विकास बैंकहरूले ४.१ प्रतिशत र वित्त कम्पनीहरूले ६.५ प्रतिशत कर्जा प्रवाह बढाएका छन्।
धितोको आधारमा कर्जा प्रवाहको विवरण पनि फरक देखिएको छ। २०८२ वैशाख मसान्तसम्ममा बैंक तथा वित्तीय संस्थाहरूले लगानी गरेको कर्जामा चालु सम्पत्तिमा आधारित कर्जा १४.६ प्रतिशत रहेको छ भने घरजग्गा धितोमा आधारित कर्जा ६५.१ प्रतिशत रहेको छ। अघिल्लो वर्ष यी अनुपात क्रमशः १२.१ र ६८.५ प्रतिशत थिए।
कर्जा प्रवाहका दृष्टिकोणले औद्योगिक उत्पादन, निर्माण, व्यापार, यातायात, सेवा उद्योग र उपभोग्य क्षेत्रमा उल्लेखनीय वृद्धि देखिएको छ। त्यसमध्ये निर्माण क्षेत्रमा सबैभन्दा बढी १२.३ प्रतिशत कर्जा प्रवाह भएको छ भने यातायात, सञ्चार र सार्वजनिक सेवा क्षेत्रमा ११.९ प्रतिशतले कर्जा बढेको छ।
कर्जाको प्रकृतिअनुसार हेर्दा, ट्रष्ट रिसिट कर्जामा सबैभन्दा धेरै ५८.१ प्रतिशतले वृद्धि भएको छ। त्यस्तै, मार्जिन कर्जा ३९.३ प्रतिशतले, रियल स्टेट कर्जा ५.२ प्रतिशतले र आवधिक कर्जा ५.१ प्रतिशतले बढेका छन्। तर, अधिविकर्ष कर्जा भने १२.९ प्रतिशतले घटेको छ, जुन बैंकिङ प्रवृत्तिमा केही परिवर्तनको संकेत हुन सक्छ।
