खोज

बुटवल, २६ जेठ ।

बुटवलमा तीन दिने समावेशी पत्रकारिता क्षमता विकास तालिम सुरु भएको छ । प्रेस सेन्टर नेपाल रुपन्देहीको आयोजना र बुटवल उपमहानगरपालिकाको सहयोगमा सञ्चालन हुने तालिम आइतबारबाट बुटवलमा सुरु भएको हो । कार्यक्रममा बोल्दै बुटवल उपमहानगरपालिकाका प्रमुख खेलराज पाण्डेले उपमहानगरले मिडिया प्रवर्द्धक क्षेत्रमा काम गरिरहेको बताए । उनले सञ्चार क्षेत्रले नगरको सकारात्मक कार्यको प्रचार र कमजोरीको निरन्तर खबरदारी गर्न आग्रह गरे ।
उनले आफूहरू निर्वाचित भएपछि सञ्चार क्षेत्रसँग निरन्तर सहयात्रा गर्दै आइरहेको र सञ्चारकर्मीहरू सामाजिक सञ्जाल केन्द्रित भएको भन्दै त्यसलाई खबरदारी गर्नुपर्नेमा जोड दिए ।

नगरपालिकाले सबै जात, जाति, भाषा र धार्मिक समुदायको हितलाई केन्द्रमा राखेर काम गरेको प्रमुख पाण्डेको भनाइ छ । बुटवल उपमहानगरपालिका उपप्रमुख सावित्रीदेवी अर्यालले बुटवलको विकासमा पत्रकारहरूको सकारात्मक साथ र सहयोग रहेको बताइन । उनले नगरपालिकाले समावेशिताको सवालमा विभिन्न कामहरू गर्दै आइरहेको बताउँदै काम गर्ने क्रममा कुनै पक्ष छुटेको भए आगामी दिनमा सच्याएर अघि बढ्ने प्रतिबद्धता जनाइन । नेपाल पत्रकार महासङ्घका केन्द्रीय सदस्य रामराज पोख्रेलले पत्रकारहरूले राज्यका निकायहरूको निगरानी र खबरदारी गर्ने पेसागत दायित्व भुल्न नहुने बताए ।

कार्यक्रममा नेपाल पत्रकार महासङ्घ लुम्बिनी प्रदेश उपाध्यक्ष राम प्रसाद आचार्य, प्रेस सेन्टर नेपाल केन्द्रीय सदस्य सरु राना, नेपाल पत्रकार महासङ्घ रुपन्देही अध्यक्ष दिनेश पाण्डे,अग्रज पत्रकार मदनलाल पौडेल र सञ्चारिका समूह रुपन्देही अध्यक्ष मिना ढकालले बोल्दै पत्रकारहरू हरेक दिन नयाँ नयाँ विषयहरूमा अब्बल हुनु पर्ने भएका कारण क्षमता अभिवृद्धि जस्ता तालिमहरू आवश्यक रहेको बताए ।तालिममा रुपन्देही जिल्लालाई कार्य थलो बनाएर पत्रकारिता गरिरहेको करिब ३० जनाको सहभागिता रहेको थियो । तालिम मङ्गलवार सम्म सञ्चालन हुने प्रेस सेन्टर रुपन्देहीका अध्यक्ष विष्षु पोखरेलले जानकारी दिए ।