खोज

काठमाडौँ ।

 भिजिट भिसा प्रकरणमा उत्पन्न राजनीतिक विवादसँगै प्रतिनिधिसभा अवरुद्ध भइरहेका बेला नेपाली कांग्रेस र नेकपा माओवादी केन्द्रबीच छलफल जारी छ।

गृह मन्त्री रमेश लेखकमाथि छानबिन गर्नुपर्ने मागसहित विपक्षी दलहरूले जेठ १३ गतेदेखि सदन अवरुद्ध गर्दै आएका छन्। विशेष गरी भिजिट भिसाको दुरुपयोग, अध्यागमन प्रणालीको बेथिति, र कथित उच्चस्तरीय संलग्नता विषयमा गम्भीर प्रश्न उठिरहेका बेला प्रमुख दलहरूबीच समाधान खोज्ने प्रयास भइरहेको हो।

यसै सन्दर्भमा नेपाली कांग्रेस र माओवादी केन्द्रका प्रमुख सचेतकहरूबीच संसद् गतिरोध अन्त्यका लागि छलफल भइरहेको छ। कांग्रेस उपसभापति पूर्णबहादुर खड्काले उक्त संवादको नेतृत्व गरिरहेका छन्। तर राष्ट्रिय स्वतन्त्र पार्टी (रास्वपा) भने कांग्रेसको प्रस्तावप्रति सहमत देखिएको छैन।

कांग्रेसले समग्र अध्यागमन प्रणालीको छानबिन गर्ने प्रस्ताव अघि सारे पनि रास्वपाले गृहमन्त्री लेखकमाथि नै छानबिन हुनुपर्ने अडान राख्दै प्रस्ताव अस्वीकार गरेको हो। गृहमन्त्रीको राजीनामा र उच्चस्तरीय छानबिन समिति गठनको मागलाई लिएर रास्वपा अझै अडिग छ।

आज दिउँसो २ बजेका लागि डाकिएको प्रतिनिधिसभा बैठक कांग्रेस–माओवादी संवाद चलिरहेकाले सुरु हुन सकेको छैन। कांग्रेसले माओवादीसँगको संवादबारे सभामुखको सचिवालयलाई जानकारी दिएपछि बैठक स्थगित गरिएको हो।

संसद् सञ्चालनमा देखिएको अवरोध हटाउन कांग्रेसले अग्रसरता देखाए पनि प्रमुख विपक्षी दलहरूको सहमति जुट्न बाँकी देखिएको छ। अहिलेको अवस्थाले मुलुकको विधायिका ठप्प भएको र राजनीतिक संवाद अपरिहार्य बनेको संकेत गरिरहेको छ।