खोज

काठमाडौं ।

इङ्ग्लिस प्रिमियर लिग (ईपीएल) का पहिलो अश्वेत रेफ्री उरियाह रेनीको ६५ वर्षको उमेरमा निधन भएको छ। सन् १९९७ देखि २००८ सम्मको आफ्नो करियरमा उनले ३०० भन्दा बढी फुटबल खेलमा रेफ्रीको भूमिका निर्वाह गरेका थिए, जसमा १७५ वटा ईपीएल खेल पनि पर्छन्।

बेलायतको शेफिल्ड एन्ड हलमशायर काउन्टी फुटबल सङ्घले एक विज्ञप्ति जारी गर्दै रेनीको निधनप्रति गहिरो दुःख व्यक्त गरेको छ। विज्ञप्तिमा उनी फुटबलमा अश्वेत प्रतिनिधित्वका लागि प्रेरणादायक पात्र भएको उल्लेख गर्दै, उनले फुटबल समुदायलाई नयाँ स्वरूप दिनमा महत्त्वपूर्ण भूमिका खेलेको जनाइएको छ।

जमैकामा जन्मिएका रेनी बाल्यकालमा शेफिल्डको वाइबोर्न क्षेत्रमा हुर्किएका थिए। सन् १९७९ मा उनले रेफ्रीको रूपमा स्थानीय फुटबलबाट आफ्नो यात्रा सुरु गरेका थिए र सन् १९९७ मा डर्बी काउन्टी र विम्बल्डनबीचको खेलमार्फत प्रिमियर लिगमा पदार्पण गरेका थिए।

प्रोफेशनल रूपमा व्यवसाय प्रशासन र कानूनमा स्नातकोत्तर गरेका रेनीलाई सन् २०२३ को नोभेम्बरमा शेफिल्ड हलम विश्वविद्यालयले खेलकुदमा योगदान र स्थानीय समुदायसँगको सम्बन्धलाई कदर गर्दै मानार्थ विद्यावारिधि उपाधि प्रदान गरेको थियो। उनको निधनसँगै फुटबल जगतले एक ऐतिहासिक व्यक्तित्व गुमाएको छ।