काठमाडौँ ।
भिजिट भिसा प्रकरणमा उच्चस्तरीय छानबिन समिति गठन गर्ने विपक्षी दलहरूको मागमा सत्तापक्ष सहमत नभएपछि संसद्को अवरोध यथावत् राख्ने निष्कर्षमा विपक्षी दलहरू पुगेका छन्। आइतबार संसद् भवन नयाँ बानेश्वरमा बसेको बैठकले सत्ता पक्षका प्रमुख दल कांग्रेस र एमालेले प्रस्तावित समिति गठनमा सकारात्मक संकेत नदिएको भन्दै अवरोध जारी राख्ने निर्णय गरेको हो।
बैठकमा प्रमुख प्रतिपक्ष दलका नेता तथा माओवादी केन्द्रका अध्यक्ष पुष्पकमल दाहाल ‘प्रचण्ड’ले कांग्रेस सभापति शेरबहादुर देउवासँग शनिबार भएको छलफलबारे जानकारी गराएका थिए। माओवादी प्रमुख सचेतक हितराज पाण्डेका अनुसार, प्रचण्डले संसद अवरोध हटाउन उच्चस्तरीय छानबिन समिति गठन गर्नुपर्ने प्रस्ताव देउवासमक्ष राखेका थिए, तर देउवा त्यसमा सकारात्मक देखिएनन्।
पाण्डेले भने, “भिजिट भिसा प्रकरणमा छानबिन गर्न उच्चस्तरीय समिति गठन हाम्रो प्रमुख माग हो र त्यो अडान कायमै छ। अहिले सत्तापक्षभित्र नै छलफल भइरहेको होला, तर हाम्रो निर्णयमा कुनै परिवर्तन छैन।”
त्यसैगरी, माओवादी उपमहासचिव शक्ति बस्नेतले कांग्रेस नेताहरूसँग गरेको थप छलफल पनि सकारात्मक नभएको जानकारी बैठकमा दिइएको थियो। विपक्षी दलहरूले सत्तापक्षबाट ठोस पहल नआएसम्म संसद सञ्चालन गर्न नदिने रणनीति लिएका छन्।
