खोज

लमही , २४ जेठ ।

राप्ती गाउँपालिकाकी कार्यपालिका सदस्य सावित्री चौधरी अर्ग्यानिक तरकारी खेतीमा सक्रिय छिन। केही समय अघिसम्म केवल राजनीतिक चासोमा सीमित देखिएकी चौधरी अहिले ६ कट्ठा जमिनमा विषादीरहित तरकारी उत्पादन गरेर समाजमा सकारात्मक सन्देश दिएकी हुन् ।

“पहिला पैसाका लागि खेती गरिन्थ्यो, अब जनताको स्वास्थ्यका लागि गरिरहेकी छु,” चौधरी भन्छिन्। करेला, बोडी र भिन्डीबाट सुरु भएको उनको अर्ग्यानिक खेतीले हाल आत्मनिर्भरता र वातावरणीय सन्तुलनमा योगदान दिन थालेको छ ।

रासायनिक मल र विषादी प्रयोग नगरी प्राङ्गारिक मल र गडौला मल प्रयोग गरेपछि राम्रो उत्पादनले उनलाई उत्साहित बनाएको छ। कीराको समस्यामा पनि रासायनिक विकल्प छाडेर जैविक विषादीमा विश्वास गर्नुभएकी उनि भन्छिन्, “बोट पनि बच्यो, वातावरण पनि। सन्तुलनको यही दृष्टिकोण चाहिन्छ ।”

तर बजारमा अर्ग्यानिक तरकारीको मूल्य सम्हाल्न भने सहज नभएको अनुभव उनले बताइन। “रासायनिक तरकारीजस्तै मूल्यमा बेच्नुप¥यो, पीडा त भयो,” उनले गुनासो गरिन् ।

बजारको चुनौतीबिच पनि सावित्रीले हार मानिन। उत्पादन बढाउने र सहकारीमार्फत अरू कृषकलाई अर्ग्यानिक खेतीतर्फ उन्मुख गराउने योजना बनाएकी छिन्। “हामी जनप्रतिनिधिले प्रमाणित गर्नुपर्छ—सफा खाना आफ्नै गाउँमै उत्पादन सम्भव छ,” उनको अठोट छ ।

सावित्रीको यो यात्रा न त केवल खेतीको अभ्यास हो, न त केवल नेतृत्वको दायित्व—यो माटोसँगको सम्बन्ध, समाजप्रतिको समर्पण र भविष्यप्रतिको उत्तरदायित्वको सशक्त मिसाल हो ।

“पहिला लाग्थ्यो, योजना पास गर्नु नै नेतृत्व हो। अहिले लाग्छ, खेतमा पस्नु पनि नेतृत्व हो,” चौधरीको भनाइमा जिम्मेवारी र सेवाको गहिरो अर्थ समेटिएको छ ।