खोज

बुटवल —

संचार क्षेत्रभित्र लैंगिक र सामाजिक समावेशीकरणको अभाव रहँदै आएको सन्दर्भमा, संचारिका समूह नेपालले सबै संचारगृहहरूमा स्पष्ट र प्रभावकारी लैंगिक नीति बनाउन आग्रह गरेको छ।

बुधबार बुटवलमा आयोजित अन्तरसंवाद कार्यक्रममा समूहले संचारगृहलाई लैंगिक समानता, सामाजिक न्याय र सबै लिङ्ग, जाति तथा समुदायको प्रतिनिधित्व सुनिश्चित गर्न आग्रह गर्‍यो।

सञ्चारिका समूहका अध्यक्ष कमला पन्थीले संचारगृहमा लैंगिकमैत्री नीति बनाउनु महिलामात्रका लागि नभई पुरुष, तेस्रो लिंगी तथा विविध सामाजिक पृष्ठभूमिका व्यक्तिहरूको प्रतिनिधित्व सुनिश्चित गर्ने माध्यम भएको बताइन्। कार्यक्रममा सहभागी संचार अभियन्ता, सम्पादक, पत्रकार महासंघका प्रतिनिधि र संचारसम्बद्ध संघसंस्थाका व्यक्तिहरूले समेत संचार क्षेत्रमा लैंगिक समावेशिता संस्थागत गर्न नीतिगत पहल आवश्यक रहेकोमा सहमति जनाए।

लुम्बिनी संचार समन्वय परिषद्का अध्यक्ष मिलन गाहले संविधानको मर्म अनुसार संचारगृहहरूले लैंगिक समानता कार्यान्वयन गर्नुपर्ने बताए। अर्का संचारकर्मी नवराज कुँवरले व्यवहारमा लैंगिकमैत्री प्रयास गरिए पनि औपचारिक नीति नहुनु कमजोरी भएको स्वीकार गरे।

कार्यक्रममा महिला पत्रकारहरू माया केसी, उर्मिला यादव, डोल्मा चौधरी, निरा गौतमलगायतले मिडियामा भोगेका लैंगिक असमानता, कार्यस्थलमा चुनौती र सकारात्मक प्रयासबारे अनुभव साझा गरे। प्रतिष्ठा थापाले संचारगृहमा भौतिक पूर्वाधार, सामग्री निर्माण प्रक्रिया र कार्य वातावरण तीनै तहमा समावेशीता कायम भएमा यसको दीर्घकालीन लाभ संचारमाध्यमलाई नै हुने उल्लेख गरिन्।

संचारिका समूहले पत्रकार महिलाको सुरक्षा, समान तलब, मातृत्व विदा, जोखिम व्यवस्थापनका संयन्त्र स्थापना, पत्रकार महिलाको पेशागत स्थायित्व, तथा सरकारी नियुक्तिमा प्राथमिकता सुनिश्चित गर्नुपर्ने माग राख्दै नीति निर्माणका लागि निरन्तर पैरवी गरिरहेको जानकारी गराइएको छ। यसले संचार क्षेत्रमा मात्र होइन, समग्र समाजमा लैंगिक समानता र समावेशीताको जग मजबुत बनाउन योगदान पुग्ने अपेक्षा गरिएको छ।