खोज

कपिलवस्तु,२२ जेठ ।

सिजनमा सहज रूपमा मल खादको व्यवस्थापन हुनु पर्ने माग गर्दै नेपाल किसान महासङ्घ जिल्ला कार्य समिति कपिलवस्तुले प्रमुख जिल्ला अधिकारी मार्फत प्रधानमन्त्रीलाई ज्ञापन पत्र बुझाएको छ । महासङ्घका जिल्ला सभापति नन्द किशोर उपाध्यायको नेतृत्वको टोलीले कपिलवस्तुका प्रजिअ दिल कुमार तामाङलाई ज्ञापन पत्र बुझाएको हो । ज्ञापन पत्रको बोधार्थ कृषि तथा पशुपन्छी विकास मन्त्रालय र नेपाली काँग्रेस पार्टी जिल्ला कार्य समिति कपिलवस्तुलाई बुझाइएको छ ।

सभापति उपाध्यायद्वारा हस्ताक्षरित ज्ञापन पत्रमा कपिलवस्तु जिल्ला नेपाल सरकारको नीति अनुसार मल खाद वितरणको लागी सहकारीको जिम्मा दिइए पनि बर्से बाली तथा हिउँदे बाली को लागी उचित मात्रामा चाहिने समय अनुकूल मल खाद सर्वसुलभ तरिका वाट उपलब्ध नभएको उल्लेख छ । महासङ्घले ज्ञापन पत्र मार्फत सरकार सँग ५ बुँदे माग राखेको छ । जसमा जिल्लामा खेती योग्य जमिन ८१ हजार ५ सय हेक्टरमा रहेकोमा  प्रति वर्ष २० हजार मेट्रिक टन युरिया, १५ हजार मेट्रिक टन डिएपी र १० हजार मेट्रिक टन पोटासको उपलब्धता सुनिश्चित हुनु पर्ने उल्लेख छ ।

त्यसै गरी उपलब्ध मल खादको वितरण प्रक्रिया गलत भएकाले सहज उपलब्धता हुनु पर्ने, बर्से बालीको लागी समय वैशाख, ज्येष्ठ महिनामा वितरण गरिदिनु पर्ने तथा हिउँदे बालीको समय भाद्र, असोज महिनामा मल खाद  व्यवस्थापन हुनु पर्ने, स्थायी सिचाई सुविधाको लागी सिचाई र विद्युतको व्यवस्थापन गर्नु पर्ने, सहकारीबाट मल खादको दुरुपयोग हुने गरेको देखिएकाले कृषि सहकारी भङ्ग गरी किसानको क्रेडिट कार्ड बनाई किसान को समस्या समाधानको लागी तत्काल पहल गरिनु पर्ने माग राखिएको छ । ज्ञापन पत्र बुझ्दै प्रजिअ तामाङले सम्बन्धित निकायमा प्रेषित गर्ने प्रतिबद्धता सहित मल खादको पारदर्शी रूपमा बिक्री वितरणका लागी आफूले समन्वयकारी भूमिका निर्वाह गर्ने प्रतिबद्धता जनाए । महासङ्घले कपिलवस्तु नगरपालिका सहितका स्थानीय तहमा समेत सोही विषयको ज्ञापन पत्र बुझाएको छ ।