खोज

भिजिट भिसाको नाममा मानव तस्करीको जालो कति फैलिएको रहेछ भन्ने कुरा विगत १० दिनको अवधिमा त्रिभुवन अन्तर्राष्ट्रिय विमानस्थल अध्यागमन कार्यालयबाट भिजिट भिसामा विदेश जान खोज्ने ६६६ जनालाई फर्काएको घटनाबाट पुष्टि हुन्छ । पछिल्लो समय दुबईमा बोलाउने र त्यहाँबाट तेस्रो देश पठाउने नाममा नेपालीहरूलाई दुःख दिने गरेको पाइएको छ । गृह मन्त्रालयका सहसचिव तीर्थ भट्टराईलाई भिजिट भिसा प्रकरणमा अख्तियार दुरुपयोग अनुसन्धान आयोगले ७ जेठमा नियन्त्रणमा लिएर केरकार थालेपछि अध्यागमन कार्यालयले कडाइ गरेको छ । जसबाट थाहा हुन्छ– नेपालबाट दैनिक ६०–७० जना युवाहरूले भिजिट भिसाको नाममा अध्यागमनमा पैसा बुझाउनु पर्ने तितो यथार्थ । त्रिभुवन अन्तर्राष्ट्रिय विमानस्थल अध्यागमन कार्यालयका अनुसार ८ जेठदेखि १८ जेठको अवधिमा भिजिट भिसामा विदेश जान खोज्ने ६६६ जनालाई फर्काइएको जनाएको छ । यसरी नेपाली युवाहरूलाई विदेश पठाउने नाममा मानव तस्करको जिम्मा लगाउने काम नेपालबाट हुँदो रहेछ– त्यो पनि अध्यागमन कार्यालयबाट ।

भिजिट भिसामा जाने युवाबाट रकम असुली गरिएको प्रकरणमा त्रिभुवन अन्तर्राष्ट्रिय विमानस्थल अध्यागमन कार्यालय प्रमुख सहसचिव तीर्थराज भट्टराईलाई नियन्त्रणमा लिएर अख्तियार दुरुपयोग अनुसन्धान आयोगले छानबिन थाल्दा गृहमन्त्री रमेश लेखकको सचिवालयका सदस्यहरू समेत मुछिएको पाइएपछि मन्त्री लेखक पनि विवादमा तानिएका छन् । जसका कारण प्रतिपक्षी दलहरू अहिले गृहमन्त्रीको राजीनामा नआई सदन चल्न नदिने अडानमा छन् । भिजिट भिसामार्फत नेपालीलाई विदेशमा तस्करी गर्ने काममा संलग्न जो कोहीमाथि कडा कारबाही होस् । यो मुद्दा अख्तियारमा पुगिसकेकोले अख्तियारले केही समयभित्रै छानबिन प्रतिवेदन सार्वजनिक गर्ला । हावा नचली पात हल्लिन भनेजस्तै यो प्रकरणमा ठुलो गिरोहको संलग्न छ भन्ने कुरा पुष्टि भैसकेको छ । अतः अख्तियारले यो गम्भीर मुद्दाको सही र सत्य तथ्य छानबिन गरी कारबाहीको प्रक्रिया अघि बढाओस् ।

मानव तस्करहरूले दुबईदेखि युरोप, अफ्रिका, अमेरिका लगायतका देशसम्म आकर्षक रोजगारीको प्रलोभन देखाएर अहिले जाल बिछाएका छन् । त्यही जालमा निर्दोष नेपाली युवाहरू फसिरहेका छन् । नेपालमा मात्रै होइन, यो गिरोह दुबईदेखि युरोप अमेरिकासम्म फैलिएको छ । तसर्थ विदेश जानुअघि एक पटक हरेक युवाले आफू कुन देश जाँदै छु, त्यहाँ पैसा कति कमाई हुन्छ ? वैध अवैध कसरी बस्न सकिन्छ ? भन्ने यावत विषयमा गम्भीर डङ्गले जानकारी लिएर मात्र जानुपर्दछ । होइन भने यस्तै मानव तस्करीको जालमा परे घर खेत डुब्नेसम्मको अवस्था हुने भएकोले होसियार हुनै पर्दछ । पुरुष मात्रै होइन महिलाहरू पनि मलेसिया, कतार, दुबई, बहराइन, जोर्डन लगायतका देशमा दलालहरूको ठगीमा परेका समाचार सार्वजनिक भइरहेका छन् । तीमध्ये कति त विदेशमै प्राण त्याग गर्न बाध्य भएका छन् ।

अरू कति अहिले पनि अलपत्र छन् । उनीहरूलाई झुटो मुद्दामा फसाउने गरिएको छ । हालै मात्र रोमानिया र क्रोसिया, आयरल्याण्ड लगायतका केही युरोपका देशमा आकर्षक जागिरको प्रलोभन देखाएर ठगी गर्ने गिरोह सक्रिय रहेको पाइएको छ । विदेशमा बस्ने र सामाजिक सञ्जाल टिकटकको माध्यमबाट आकर्षक कमाई हुने प्रचार प्रसार गरी सोझा सीधा नेपालीलाई ठगी गर्ने गिरोह सक्रिय रहेको छ । पछिल्लो पटक पुरुष मात्रै होइन, महिलाहरू समेत ठगीमा जोडिएका छन् । महिलाहरूले महिलाहरूलाई ठगी गरिरहेका छन् । पुरुष मात्रै होइन, महिलाको प्रयोग गरेर ठगी काम चलिरहेको छ । सम्बन्धित निकाय मौन छ । आकर्षक सेवा सुविधा सहित काम लगाइदिने भन्दै ठगी गिरोहले नक्कली ‘वर्क पर्मिट’ बनाएर ठगी गर्ने गरेको पनि बेलाबखत सुनिँदै आइएको छ । मानव तस्करीको धन्दा अहिले मात्रै होइन, पहिल्यैदेखि फैलिएको छ तर अहिले यो ब्यापक रूपमा फस्टाएको छ । मानव तस्करी जस्तो डरलाग्दो तथा जघन्य अपराध फस्टाउनु निश्चित रूपमा चिन्ताको विषय हो । पछिल्लो पटक भिजिट भिसाका नाममा भइरहेको मानव तस्करीमा संलग्नमाथि कडा कारबाही होस् ।