खोज

दाङ,२१ जेठ ।

घोराही उपमहानगरपालिकाले खाद्य गुणस्तर र उपभोक्ताको स्वास्थ्य सुरक्षाका लागि विभिन्न गुणस्तर मापन गर्ने यन्त्रहरु ल्याएको छ । यस अघि दुधको गुणस्तर मापन गर्ने “मिल्क एनालाईजर मेसिन“ ल्याएर जाँच गरेको घोराही उपमहानगरपालिकाले हालै खानेतेल र पानीको शुद्धता मापन गर्ने यन्त्र ल्याएको छ ।

उपमहानगरपालिकाको उपभोक्ता हित संरक्षण शाखाले मंगलबार घोराहीमा होटल व्यवसायीहरुसंग कार्यक्रम गरेको हो । खाने तेलको गुणस्तर मापन गर्ने “आयल टेस्टोमिटर “ र पानीको शुद्धता मापन गर्ने “वाटर किट “ ल्याएर परीक्षण थालेको हो । घोराहीका नगर प्रमुख नरुलाल चौधरीले खाने तेलको गुणस्तर कस्तो छ भनेर मापन गरी उद्घाटन गरेको हुन् । होटलहरुमा एउटै तेल पटक पटक प्रयोग गरी विभिन्न खाद्य बस्तुहरु पकाउने गरेको भन्ने उपभोक्ताहरुको गुनासो आएपछि उपभोक्ता हित संरक्षण शाखाले उक्त मेशिन किनेर गुणस्तर मापन र सचेतना जगाउन लागेको बताए ।

उपप्रमुख हुमाकुमारी डिसीले व्यावसायिक इमान्दारिता र उपभोक्ता मैत्री सेवा तथा व्यवसायले नै मानव स्वास्थ्य राम्रो हुने बताए । सो कार्यक्रममा होटल व्यवसायी समिति दाङका अध्यक्ष इश्वर बुढा, नेपाल पत्रकार महासंघका केन्द्रीय सचिव सविन प्रियाशन लगायतले शुभकामना व्यक्त गर्दै आम उपभोक्ताको खाद्य स्वच्छता सम्बन्धी अधिकारको संरक्षण गर्दै नगरले व्यवसायीहरुलाई सचेतीकरण गर्ने कार्यक्रम सन्चालन गर्नु स्वागतयोग्य कार्य गरेको उल्लेख गरेको थिए ।

सो कार्यक्रममा घोराही उपमहानगरपालिका सरसफाइ व्यवस्थापन शाखाका प्रमुख लक्ष्मण अधिकारी, खाद्य प्रविधि तथा गुण नियन्त्रण डिभिजन कार्यालय तुल्सीपुरका खाद्य निरीक्षक सुदर्शन गोसाइ, घोराही उपमहानगरपालिका उपभोक्ता हित संरक्षण शाखाका प्रमुख मोहन सिंह सुनार, आर्थिक विकास समितिका संयोजक खोपीराम चौधरी लगायतले भनाइ राखेका थिए ।