खोज

कपिलवस्तु, २१ जेठ ।
कपिलवस्तुका अधिकांश पेट्रोल पम्पले उपभोक्ता ठग्दै आएको पाइएको छ । जिल्ला प्रशासन कार्यालय, कपिलवस्तु र गुणस्तर तथा नाप तौल कार्यालय बुटवलको संयुक्त अनुगमन टोलीले पेट्रोलियम पदार्थ वितरण पम्पमा गरेको अनुगमनका क्रममा ठगी गरेको पाइएको हो । ठगी गरी मापदण्ड भन्दा कम मात्रामा इन्धन बिक्री वितरण गरेको भेटिएका दुई पेट्रोल पम्पलाई सिलबन्दी गरिएको छ ।

सहायक प्रमुख जिल्ला अधिकारी पदमलाल लामिछानेको नेतृत्वको छड्के अनुगमन टोलीले तौलिहवाको कपिलवस्तु नगरपालिका वडा नम्बर २ को उमा ट्रेडिड्ड कम्पनी, सोही वडाको वर्दहवाको शङ्कर पार्वती आयल स्टोर्स, वडा नम्बर ४ कोदहवाको ओझा फिलिगं सेन्टर र वडा नम्बर ३ को चिन्नीलाल कान्दु पेट्रोल पम्प गरी चार वटा पेट्रोल पम्पको अनुगमन गरेको थियो । सो क्रममा मापदण्ड भन्दा कम मात्रामा इन्धन बिक्री गर्ने कपिलवस्तु नगरपालिका वडा नम्बर २ स्थित जमुवारटोलको उमा ट्रेडिड्ड कम्पनीको २ वटा पेट्रोल मेसिन र १ वटा डिजेल मेसिन तथा वडा नम्बर ४ कोदहवाको ओझा फिलिड्ड सेन्टरको १ वटा पेट्रोल मेसिन र १ वटा डिजेल मेसिनमा मापदण्ड भन्दा कम मात्रामा इन्धन भेटिए पछि सिल गरेको हो ।

टोलीले सिल गरिएका पेट्रोल पम्पलाई ३ दिन भित्र गुणस्तर तथा नाप तौल कार्यालय बुटवलमा कार्यालयमा सम्पर्क गर्न निर्देशन दिइएको छ । सिल गरिएका पेट्रोल पम्पलाई स्टयान्डर्ड नाप र तौल ऐन २०२५ अनुसार निश्चित तौल भन्दा घटी इन्धन बिक्री वितरण गरेको अवस्थामा पचास हजार रुपैयाँदेखि १ लाख रूपैया सम्म जरिवाना गरिने जनाइएको छ । चार वटा पेट्रोल पम्पको अनुगमनको क्रममा मापदण्ड भन्दा कम मात्रामा इन्धन बिक्री वितरण गरेको भेटिएका दुई पेट्रोल पम्पलाई सिल गरिएको गुणस्तर तथा नाप तौल कार्यालय बुटवलका निरीक्षक निराजन पुडासैनीले जानकारी दिए ।

नागरिकले पेट्रोलियम पदार्थ बिक्री वितरणमा मापदण्ड भन्दा कम मात्रा हुने गरेको भनी गर्दै आएको जनगुनासोको आधारमा अनुगमन गर्दा दुई पेट्रोल पम्पमा पेट्रोलियम बिक्री वितरण मापदण्ड भन्दा कम भएको भेटिएपछि आवश्यक कारबाही अगाडी बढाइएको कपिलवस्तुका सहायक प्रमुख जिल्ला अधिकारी पदमलाल लामिछानेले बताए । उनले अनुगमनको कार्यलाई निरन्तरता दिइने स्पष्ट पारे । सहायक प्रजिअ लामिछानेको नेतृत्वमा नाप तौल कार्यालयका निरीक्षक पुडासैनी, जिल्ला प्रशासन कार्यालय कपिलवस्तुका नासु बाबुराम शर्मा, नाप तौल कार्यालयका गुरु प्रसाद पोख्रेल, वडा प्रहरी कार्यालय तौलिहवाका प्रहरी नायब निरीक्षक राम चन्द्र घर्ती र नेपाल पत्रकार महासङ्घ कपिलवस्तुका प्रतिनिधिको टोली अनुगमनमा पुगेको थियो ।