खोज

काठमाडौं, २० जेठ ।

नेपाली कांग्रेसका महामन्त्री गगनकुमार थापाले नेपाली कांग्रेस र नेकपा एमालेसहितको गठबन्धन सरकारले संविधान संशोधन गर्ने सात बुँदे वाचा बिर्सिएको बताएका छन्। बाँके क्षेत्र नम्बर २ मा आयोजित क्षेत्रीय सम्मेलनलाई सम्बोधन गर्दै थापाले सरकार अहिले वाचा कार्यान्वयनभन्दा ‘सरकार चलाउन मस्त’ भएको टिप्पणी गरे।

उनले संविधान संशोधनलाई प्रमुख प्राथमिकता दिनुपर्नेमा त्यसप्रति बेवास्ता भइरहेको उल्लेख गर्दै भने, “हामी यति मस्त भएका छौँ कि संविधान संशोधनको मुख्य वाचा नै बिर्सियौँ। कांग्रेस–एमालेले सात बुँदाअनुसार तत्काल काम गर्नुपर्छ।”

गगन थापाले संघीय लोकतान्त्रिक गणतन्त्रको व्यवस्था नै सही भएको तर त्यसको सञ्चालन गर्नेहरूमा कमजोरी रहेको बताए। “समस्या व्यवस्थामा होइन, यसको चालकमा हो। यो बाटो हामीले रोजेको हो, बाटो होइन, गाडी बिग्रिएको हो,” भन्दै उनले गाडी अर्थात् व्यवस्था सञ्चालन गर्ने राजनीतिक दलहरू, विशेषतः कांग्रेसले आफूलाई समयअनुसार परिमार्जन गर्नुपर्नेमा जोड दिए।

उनले सुशील कोइरालाको नेतृत्वमा जारी भएको संविधानलाई ‘नयाँ हाइवे’ को संज्ञा दिँदै त्यसको मर्मत सम्भार र सुधार कांग्रेसको जिम्मेवारी भएको बताए। “हामीले बनाएको बाटो सही हो, तर त्यसमा चलेका गाडीहरू (दलहरू) पुराना र थोत्रा देखिएका छन्। चालकले गाडी राम्रोसँग चलाउन नसकेको हो,” उनले भने।

गगन थापाले नयाँ विकल्प खोजेर समय खेर नफाल्न आग्रह गर्दै वर्तमान व्यवस्थाको सुधारमा कांग्रेसले नेतृत्व लिनुपर्ने धारणा राखे। “गाडीको चालक र मर्मतको कुरा छाडेर फेरि नयाँ बाटो खोज्न लागियो भने अर्को दस वर्ष खेर जान सक्छ,” उनले चेतावनी दिए।