खोज

बुटवल, २० जेठ । शक्ति, सहकार्यको उत्कृष्ट तालमेलका समिश्रणको रुपमा मानिने डोरी तान खेललाई प्रवद्र्धन गर्न रुपन्देहीमा प्रतियोगिता गरिने भएको छ । नेपाल खेलकुद महासंघ, जिल्ला कमिटि रुपन्देहीको आयोजनामा जेठ ३१ गते प्रथम पालिका स्तरीय खुला पुरुष डोरी तान (टग अफ वार) प्रतियोगिता २०८२ हुने भएको हो ।
‘खेलकुद विकासका लागि स्थानिय तहदेखी केन्द्रसम्म भौतिक पूर्वाधार, ब्यवसायिक र प्रतिस्प्रर्धी खेलकुद गतिविधि हाम्रो आधार’ भन्ने नारासहित प्रतियोगिता आयोजना हुन गैरहेको कमिटिका अध्यक्ष समुन्द्र श्रेष्ठले बुटवलमा पत्रकार सम्मेलन गरि बताए । परम्परा, शक्ति र सामूहिकता बोकेको खेलका रुपमा डोरी तान खेल रहेको उनले बताए । दुई टोलीबीच शक्ति, तालमेल र सहकार्यको उत्कृष्ट परीक्षणका रुपमा खेलिने एक प्राचीन र विश्वव्यापी रुपमा लोकप्रिय खेल भएर पनि ब्यवसायिक हुन नसकेको हुदा यसलाई युवा वर्गमा प्रतियोगितामार्फत चिनाउने प्रयास गरेको उनले बताए । यो खेल शारीरिक तागतसँगै रणनीतिक सोच र सामूहिक प्रयासमा आधारित हुने उनले बताए । चीन, इजिप्ट, ग्रीस र भारत लगायतका सभ्यतामा यो खेल शक्ति प्रदर्शनका रुपमा खेलिने गरेको पाइन्छ । आधुनिक समयमा यो खेल विद्यालयदेखि राष्ट्रिय तथा अन्तर्राष्ट्रिय प्रतियोगितासम्म आयोजना हुने गरेको उनले बताए । सन् १९६० मा टग अफ वार ईन्टरनेश्नल फेडेरेसनको स्थापना भएको तथा विभिन्न देशहरूमा प्रतियोगिता र नियमको मान्यता दिदै आएको उनले बताए । यो खेल केही वर्षअघिसम्म ओलम्पिक खेलमा समेत समावेश भएको थियो ।

कार्यक्रममा नेकोस केन्द्रिय सचिवालय सदस्य एवं रुपन्देही इन्चार्ज शंकर पाण्डेले पछिल्लोसमय ओझेलमा परेको खेललाई चर्चामा ल्याउने गरि प्रतियोगिता गर्न लागेको बताए । खेलकुद विकासका लागि प्रतियोगिता अनिवार्य हुने भन्दै उनले खेलाडीको प्रतिभा देखाउने अवसरका साथै भाईचारा विकासमा समेत खेलकुदको भुमिका रहने बताए ।

रुपन्देही जिल्ला कमिटि सचिवालय सदस्य एवं खेलकुद इन्चार्ज नकुल शाहीले महासंघमा आवद्ध सबै खेल विधालाई प्राथमिकतामा राखेर गतिविधिमा जोड दिने बताए । खेलाडीको मनोबल, प्रतिभा र खेलस्तरलाई वृद्धि गर्ने उदेश्यका साथ खेल गतिविधिसंगै पूर्वाधार विकासमा सरकारको ध्यान आर्कषण गर्न आफुहरु संस्थागत रुपमा पहल गर्ने उनले बताए ।

कार्यक्रममा नेकोस केन्द्रिय सदस्य जुनु भण्डारी, नेपाल खेलकुद पत्रकार मंच रुपन्देहीका अध्यक्ष सुमन अधिकारी, डोरी तान संघका केन्द्रिय सदस्य नवराज खरेल, नेकपा एमाले वडा नं. ११ सचिव बिर बहादुर कुवर, नेकोस बुटवल नगर अध्यक्ष प्रविण गैरेले समाजमा धेरै प्रचलित खेलका रुपमा रहेको डोरी तान खेल नया पुस्तामा हराउ थालेको भन्दै प्रचार प्रसार र गतिविधिमा जोड दिन आग्रह गरे ।

समुदायमा रहेका खेलप्रेमीहरुको सहयोगमा प्रतियोगिता सम्पन्न गर्ने तयारी रहेको भन्दै उनले मुख्य प्रायोजक, प्रायोजक, सहप्रायोजक वापत सहयोग गर्ने दाताहरुलाई सम्मानपत्रबाट सम्मान गरिने बताए । सिद्धेश्वरी खेलमैदानमा गरिने प्रतियोगिता बेष्ट अफ थ्रि को आधारमा खेलाईने खेल संयोजक त्रिभुवन शर्मा पाण्डेले बताए । प्रतियोगिताको प्रथम टिमलाई नगद ५० हजार, दोस्रो हुने टिमलाई नगद २० हजार तथा तेस्रो हुने टिमलाई नगद १० हजार रुपैया, कप, मेडल, प्रमाणपत्रबाट पुरस्कृत गरिने छ । प्रतियोगितामा भाग लिने प्रत्येक टिममा ८ जना सदस्यको कुल तौल ६४० केजी हुनुपर्ने छ । प्रतियोगितामा ६ लाख ४० हजार रुपैया खर्च हुने अनुमान रहेको छ ।