खोज

कपिलवस्तु, २० जेठ ।

कपिलवस्तु नगरपालिकालाई पूर्ण खोप सुनिश्चितता तथा दिगोपना घोषणा गरिएको छ । तोकिएको उमेर समूहका बालबालिकालाई खोप सुनिश्चितता भएको भेटिए पछि जिल्ला समन्वय समिति कपिलवस्तुका प्रमुख तथा खोप समन्वय समितिका संयोजक बाबुराम आचार्यले पूर्ण खोप सुनिश्चितता घोषणा गरेका हुन ।

कार्यक्रममा पालिकालाई पूर्ण खोप सुनिश्चितता प्रमाणपत्र समन्वय प्रमुख आचार्यले कपिलवस्तु नगरपालिका प्रमुख सुदिप पौडेललाई हस्तान्तरण गरेका थिए । कपिलवस्तु नगरपालिकालाई पूर्ण खोप सुनिश्चितता तथा दिगोपना घोषणा सँगै जिल्लालाई घोषणाको कार्यले सार्थकता पाउन थालेको जनाउँदै आगामी दिनमा पनि खोपको कार्यक्रमलाई अभियानकै रूपमा सञ्चालन गर्न आवश्यक रहेकोमा प्रमुख आचार्यले जोड दिए ।

खोपले बालबालिकामा विभिन्न रोगबाट बच्ने प्रतिरोधात्मक क्षमता बढ्ने भएकाले खोप लगाउनका लागि अभिभावकलाई सचेत बनाउन सबैको भुमिका महत्वपुर्ण रहने कपिलवस्तु नगरपालिकाका प्रमुख सुदिप पौडेलले बताए । घोषणा पुर्व पालिकाको १२ वटै वडाका स्वास्थ्यकर्मी, महिला स्वास्थ्य स्वंसेविकाले फिल्डस्तरमा गरेको परिश्रमको नतिजालाई घोषणाको रुपमा लिनु पर्ने उनको भनाई थियो ।

नगरका १२ वटै वडाका खोप लगाउने उमेर समूहका बालबालिकाले खोप लगाएको सुनिश्चित गरिएपछि पूर्ण खोपयुक्त सुनिश्चित पालिका घोषणा गरिएको कपिलवस्तु नगरपाकिलाका स्वास्थ्य शाखाका प्रमुख उमेश गुप्ताले बताए । नगरपालिकाले दिगोपना र पूर्ण खोप सुनिश्चितताका लागि हरेक वर्ष चैत महिना नियमित खोपको घरदैलो सर्वेक्षण गरी बैशाखमा खोज र खोप अभियान चलाएको गुप्ताले बताए ।

उनले घरधुरी सर्वेक्षणको प्रतिवेदनमा भेटिएका शुन्यदेखि १५ महिनाका १ हजार ८ सय ९४ जना, १६ देखि २३ महिनाका १ हजार ५ सय ७, शुन्य देखि १५ महिनाको ड्रप आउट २० जना र १६ देखि २३ महिनाको ड्रप आउट भएका बालबालिका १ सय १५ जना लाई खोप लगाएको सुनिश्चितता पछि पालिकालाई पूर्ण खोप सुनिश्चितता तथा दिगोपना घोषणा गरिएको उनले प्रष्ट पारे ।

उमेर अनुसार खोप पाए नपाएको यकिन गरेर खोप लगाउन छुटेको पाइएमा वैशाख महिनामा खोप दिने व्यवस्था गरेको छ । प्रत्येक वडामा वडास्तरीय खोप समन्वय समितिले पालिकालाई बालबालिकाले खोप लगाएको सुनिश्चित गरेपछि पालिकालाई पूर्ण खोपयुक्त पालिका सुनिश्चितता घोषणा गरिएको हो ।

कार्यक्रमलाई सफल बनाउन सहयोग पुर्याएका स्वास्थ्यकर्मीहरु सिर्जना भट्टराई, सुमित्रा ज्ञवाली, सुरेश गुप्ता, गोरख चौधरी, रमेश शर्मा, सुभाषचन्द्र यादव, मोहम्मद नुमान, कमला पन्थी, हरि नारायण चौधरी, वसन्त पौडेल, सिद्धार्थ काजी बज्राचार्य र गोविन्द चौधरीलाई सम्मान गरिएको थियो । कार्यक्रममा प्रमुख प्रशासकीय अधिकृत पुनाराम पौडेल, वडाध्यक्षहरु, स्वास्थ्य चौकीका कर्मचारी, सरोकारवाला, पत्रकार लगायतको सहभागिता रहेको थियो ।