खोज

लमही, १९ जेठ ।

दाङ जिल्लामा क्रियाशील सार्वजनिक यातायात व्यवसायीहरूले आजदेखि अनिश्चितकालीन रूपमा यातायात सेवा बन्द गर्ने घोषणा गरेका छन् । आइतबार पत्रकार सम्मेलन गरी आन्दोलनको औपचारिक जानकारी दिएका छन् । सम्मेलनमा त्रिशिद्धेश्वरी राप्ती यातायात सेवा प्रालिका अध्यक्ष सुरेश हमालले सरकारको उदासीनता र दीर्घकालीन समस्याप्रति बेवास्ताका कारण आन्दोलनमा उत्रनु परेको बताए । “यो आन्दोलन सम्पूर्ण यातायात व्यवसायी, मजदुर, कर्मचारी तथा यात्रुहरूको दीर्घकालीन हितका लागि हो,” उनले भने । अध्यक्ष हमालले बन्दको समयमा अनुमति बिना सञ्चालन हुने सवारीसाधनलाई कडा कारबाही गर्ने चेतावनीसमेत दिएका छन् । “अनुमति बिना सञ्चालन गरिने गाडीहरूलाई कारबाही गरिनेछ । आन्दोलन अवज्ञा नगर्न अनुरोध गर्दछौँ,” उनले भने ।

व्यवसायीहरूका अनुसार बन्दको प्रभाव दाङसँगै देशभर पर्न सक्नेछ । समस्या समाधान नभएसम्म आन्दोलन नरोकिने उनीहरूको चेतावनी छ । सार्वजनिक यातायात व्यवसायीहरूले आइतबार काठमाडौँको माइतीघर मण्डलादेखि बिजुली बजारसम्म विरोध ¥याली गर्दै आन्दोलनको औपचारिक सुरुआत गरेका हुन् । प्रदर्शनमा सहभागी व्यवसायीहरूले ‘सार्वजनिक यातायात क्षेत्र जोगाऔँ’ भन्ने नारासहित नयाँ सवारी तथा यातायात व्यवस्था नियमावलीको कडा विरोध गरेका छन् । उनीहरूले बागमती प्रदेश सरकारको सवारी तथा यातायात व्यवस्था ऐन २०७५ को दफा १३ को उपदफा ४ खारेज गर्न र राइड सेयरिङ एपहरू तत्काल बन्द गर्नुपर्ने माग गरेका छन् ।

सङ्घर्ष समितिका प्रतिनिधिहरूले सरकारको एकतर्फी निर्णयले व्यवसायी र मजदुर दुवैलाई मर्का परेको गुनासो गरेका छन्। “सात बुँदे माग पूरा नभएसम्म आन्दोलन नरोकिनेछ,” उनीहरूको भनाइ छ । सरकारले भने यातायात क्षेत्रको व्यवस्थापनलाई प्रभावकारी बनाउन नयाँ नियमावली ल्याइएको बताउँदै फिर्ता नलिने अडान दोहोराउँदै आएको छ । दुवै पक्ष अडानमा रहेकाले आन्दोलन दीर्घकालीन हुने सङ्केत देखिएको छ ।