खोज

सितगंगा (अर्घाखाँची), १८ जेठ ।

रोटरी क्लब अफ बुटवल चौतारीले अर्घाखाँची सितगंगा नगरपालिकाका तीनवटा वडाका बासिन्दालाई लक्षित गर्दै मेगा स्वास्थ्य शिविर तथा एम्बुलेन्स हस्तान्तरण गरेको छ ।

सितगंगा नगरपालिका वडा नम्बर ५, ६ र ७ का बासिन्दाहरूलाई लक्षित गरी एक दिवसीय मेगा स्वास्थ्य शिविर सञ्चालन गर्नुका साथै नगरपालिकालाई एम्बुलेन्स हस्तान्तरण गरिएको हो । देउराली आधारभूत स्वास्थ्य केन्द्र, जुकेनामा सम्पन्न कार्यक्रममा स्थानीय बासिन्दाको उल्लेख्य सहभागिता थियो ।

शिविरमा ४१२ जनाले निःशुल्क स्वास्थ्य परीक्षण तथा परामर्श सेवा प्राप्त गरेको रोटरी क्लव अफ बुटवल चौतारीका अध्यक्ष नुमेन्द्र पौडेलले जानकारी दिए । जसमा २९० महिला, १२२ पुरुष र ५० बालबालिका रहेका थिए । बिहानैदेखि स्थानीय बासिन्दाहरू लाइनमा उभिएर सेवा लिएका दृश्यले शिविरको सफलतालाई उजागर गरेको पनि उनले बताए ।

 रोटरी क्लब बुटवल चौतारीका अध्यक्ष नुमेन्द्र पौडेलकै नेतृत्वमा भएको कार्यक्रमको उदघाटन सितगंगा नगरपालिकाका नगरप्रमुख छविलाल पौडेलले गरेका थिए । कार्यक्रममा उप प्रमुख गीता भाटको पनि उपस्थिति थियो । त्यस्तै कार्यक्रममा रोटरीयन प्रज्वल थान्जु, ओम जैसी, प्रमोद पन्थी, सुनील कासौधन, विजय खनाल लगायतको पनि उपस्थिति रहेको थियो ।

कार्यक्रममा क्लबका ४५ जना रोटरीयनहरूको सक्रिय सहभागिता रहेको थियो, जसमा संस्थापक अध्यक्ष डा. विष्णु घिमिरे, पूर्वअध्यक्ष दिनेशमणि सुवेदी, अध्यक्ष मनोनीत राजु अधिकारी, अध्यक्ष प्रस्तावित कपिल पोखरेल, सचिव खगेन्द्र बेलबासे लगायत अन्य पदाधिकारीहरू पनि सहभागी थिए ।

स्वास्थ्य सेवा प्रदान गर्ने टोलीको नेतृत्व डा. सुन्दर न्यौपाने, श्रीकान्त सुवेदी र कृष्ण जीसीले गरेका थिए । डाक्टरहरूको टोलीमा डा. अब्दुल सबुर खान, डा. आरती श्रेष्ठ, डा. विनोद पौडेल, डा. कृष्णकुमार यादव, डा. सन्तोष पाण्डे, डा. सन्ध्या अधिकारी र डा. प्रतिभा पन्थी लगायतले स्वयंसेवकका रूपमा सहभागी भएर स्वास्थ्य सेवा उपलब्ध गराएका थिए ।

वडाध्यक्ष ऋषि बहादुर रेश्मीले स्थानीय व्यवस्थापनमा सहयोग गरेका थिए भने रेडियो सितगंगाका अध्यक्ष नारायण शर्मा र स्थानीय पत्रकारहरूले पनि कार्यक्रमको प्रचार प्रसारमा महत्वपूर्ण भूमिका खेलेको क्लवले जनाएको छ ।

कार्यक्रममा नगरप्रमुख पौडेल, उपप्रमुख गीता भाट, डा. घिमिरे, रोटरीयन थान्जु, रोटरीयन सुवेदी लगायतले मन्तव्य व्यक्त गर्दै रचनात्मक कार्यक्रम गरेको भन्दै प्रशंसा गरेका थिए । त्यस्तै उनीहरुले एम्बुलेन्स हस्तान्तरणले आपतकालीन स्वास्थ्य सेवामा सुधारको नयाँ अध्याय सुरु गरेको पनि बताएका थिए ।

दाताहरूको उदार सहयोग र सम्पूर्ण टोलीको समर्पणका साथ सम्पन्न कार्यक्रमले “सेवा, सहयोग र समर्पणले नै समाजमा परिवर्तन सम्भव छ” भन्ने सन्देश दिएको उनीहरुको भनाई थियो ।