खोज

बुटवल, १८ जेठ । छाडा कुकुरहरूबाट सहरी क्षेत्रमा बढ्दो सार्वजनिक स्वास्थ्य जोखिम न्यूनीकरण गर्न तथा मानव–जनावर सहअस्तित्वलाई प्रवद्र्धन गर्न देवदह नगरपालिका–८, चरङेमा आधुनिक कुकुर उपचार केन्द्र स्थापना गरिएको छ । यशोधा पार्वती फाउण्डेसनको पहल, अल केयर नेपालको सक्रियता र स्थानीय समाजसेवी तथा जनप्रतिनिधिको सहयोगमा सञ्चालनमा ल्याइएको हो । केन्द्रमा घाइते, बिरामी, अशक्त र छाडा कुकुरहरूको निःशुल्क उपचार, सर्जरी, बन्ध्याकरण, रेखदेख र पुनःस्थापना गरिनेछ ।

एक समारोहका बिच देवदह नगरपालिकाका नगरप्रमुख ध्रुवप्रसाद खरेल, यशोधा फुड्सका सञ्चालक तथा फाउण्डेसनका संरक्षक कमलकिशोर मालपानी, फाउण्डेसनका अध्यक्ष चुन्न प्रसाद पौडेल, सदस्य नरिश्वर पौडेल, अल केयर नेपालका दिपक रिजालले भवनको उद्घाटन, संस्थालाई डग एम्बुलेन्स हस्तान्तरण गरेका छन ।
कार्यक्रममा नगरप्रमुख ध्रुवप्रसाद खरेलले मानवको सबैभन्दा पुरानो घरपालुवा जनावर कुकुर भएको भन्दै यसको सेवा गर्नु पनि समाजप्रतिको कर्तव्य हुने बताए । यस्तो केन्द्रले सहरी जनस्वास्थ्य र पशु कल्याणमा सन्तुलन ल्याउनेमा आशाबादी रहेको भन्दै यसमा स्थानिय सरकारको सहयोग गर्ने प्रतिवद्धता जनाए ।

फाउण्डेसनका सदस्य नरिश्वर पौडेलले ६ वर्षअघि बुटवलका केही युवाहरूले सडकका छाडा कुकुरहरूको उपचार र हेरचाहको अभियान थालेको भन्दै यही अभियानलाई संस्थागत बनाउँदै यशोधा पार्वती फाउण्डेसन गठन भई केन्द्र स्थापना गरिएको बताए । यो केन्द्र नाफाका लागि नभई निःस्वार्थ सेवाका लागि भएको उनले बताए ।

कार्यक्रममा बुटवल उद्योग वाणिज्य संघका अध्यक्ष हरि अर्याल, यशोधा पार्वती फाउण्डेसनका अध्यक्ष चुन्न प्रसाद पौडेल, कामधेनु गौशाला देवदहका संरक्षक सोमराजजी महाराज, वडाअध्यक्ष एक बहादुर सुनार, वडाअध्यक्ष मोहन जिसि, बुटवल उधोग वाणिज्य संघका अध्यक्ष हरि अर्याल, फाउण्डेसनका सदस्य सुनन्धा मालपानी, समाजसेवी सरस्वती बश्याललगायतले प्रेरणादायक, अनुकरणीय र दीगो विकासतर्फको कदम चालिएको भन्दै यसमा सबैको साथ र सहकार्य जरुरी रहने बताए ।

केन्द्रमा अलग छुट्टिएको उपचार कक्ष, सर्जरी र आपतकालीन उपचार सेवा, रेबिज रेकर्डिङ तथा भ्याक्सिन कार्यक्रम, बन्ध्याकरण क्याम्प, डग एम्बुलेन्स सेवा लगायतको सुविधा रहने अल केयर नेपालका दिपक रिजालले बताए । साथै केन्द्रले जनचेतनामूलक कार्यक्रम, रेबिज नियन्त्रण पहल तथा कुकुरलाई खाद्य व्यवस्थापन पनि गर्दै जानेछ ।