खोज

बुटवल, १८ जेठ ।

बुटवल उपमहानगरपालिकाले सीमा जोडिएका पालिकाहरूसँग सहकार्य र संयुक्त अभ्यास सम्बन्धमा शनिवार बुटवलमा गरेको छ ।कार्यक्रममा बोल्दै पूर्व मन्त्री बालकृष्ण खाँणले  अर्थमन्त्रीलाई पटक–पटक  धन्यावाद दिँदै  शिथिल बनेको अर्थतन्त्र चलायमान बनाउने गरी बजेट आएको बताए । ‘रोष्टममा उभिएपछि अर्काका बारेमा विरोध गर्ने प्रचलन बनेको छ, तर वर्तमान प्रधानमन्त्री, अर्थमन्त्रीले शिथिल अर्थतन्त्रलाई चलायमान बनाउने गरी उत्कृष्ट बजेट ल्याउनुभएको छ, यसका लागि म अर्थमन्त्री ज्यूलाई यही मञ्चबाट धन्यवाद दिन्छु ।’

रुपन्देही क्षेत्र नं. २ बुटवल क्षेत्रबाट निर्वाचित भएका अर्थमन्त्रीलाई उनकै नगरमा पूर्व गृहमन्त्रीले प्रशंसा गर्दा सहभागीहरूले ताली बजाएर समर्थन गरे । ‘इतिहासमै सुवर्ण शमशेरपछिको क्रान्तिकारी बजेट हो’ खाँणले भने । उनले बजेटले मुलुकको विद्यमान आर्थिक चुनौतीलाई सुधार गर्ने बताए । ‘बजेट यथार्थमा आधारित रहेको छ ’ उनले भने । उनले यसअघि नेपालमा आउने पर्यटकहरूले २५ हजार रुपैयाँ ल्याउन पाउने अवस्था रहेको भन्दै अहिले सरकारले ल्याएको बजेटले त्यसलाई ५ सय डलर पुर्‍याएको बताए । यसले नेपालको पर्यटन प्रवर्द्धनमा टेवा दिने बताए ।

उनले बजेटले विदेशी लगानी भित्र्याउन, लगानीका लागि निजी क्षेत्रलाई उत्साही बनाउने काम गरेको बताए । पूर्व गृहमन्त्री खाँणले भारतीय पर्यटकलाई नेपाल प्रहरीले अनेक सास्ती, झन्झट र चेकिङले गरेको भन्दै यसले पर्यटन प्रवर्द्धन नहुने बताए । उनले यसलाई तत्काल सुधारका लागि प्रदेशका मन्त्री, प्रहरी प्रशासनको समेत ध्याआर्कषण गराए । उनले स्थानीय, प्रदेश र सङ्घीय सरकारहरूले बजेट ल्याउँदा केन्द्रीय नीतिलाई हेर्न समेत ध्यानाकर्षण गराए । खाँणले लामो समयपछि आफू बोल्न पाएको भन्दै सबैलाई सम्झिए ।

नेकपा माओवादी केन्द्रका नेतालाई समेत सम्झिएका उनले काँग्रेस एमालेको गठबन्धन जनताले बनाएको समेत भन्न भ्याए । ‘चुनावको बेला हामी माओवादी सहितको गठबन्धनमा थियौँ, तर बुटवलमा काँग्रेस र एमालेलाई जिताए’ खाँणले भने –‘अहिले केन्द्र प्रदेशदेखि नै काँग्रेस एमाले गठबन्धन बनेको छ ।’ यस्तै कार्यक्रममा लुम्बिनी प्रदेशका आर्थिक योजना तथा मामिला मन्त्री धनेचन्द्र कार्कीले बुटवल उपमहानगरपालिकाले सीमाका पालिकाहरूसँग छलफल गरेर दिगो विकासको नीति लिएको बताए । उनले प्रदेश सरकारले समेत सहकार्यको अभ्यास गरेको बताउँदै बुटवल उपमहानगरको थालनी सकारात्मक रहेको बताए ।

यस्तै उनले लुम्बिनी प्रदेशमा भारतीय पर्यटकहरूलाई प्रहरी प्रशासनबाट भएको चेकिङ सम्बन्धी गुनासोलाई तत्काल समाधान गर्न प्रशासनको ध्यानाकर्षण गराए । अन्तरक्रिया कार्यक्रममा बुटवल उपमहानगरका नगरप्रमुख खेलराज पाण्डेयले आफूहरूले छिमेकी पालिकाहरूसँग सहकार्य गरेर अगाडि बढ्ने नीति लिएको भन्दै सङ्घ र प्रदेश सरकारले सहयोग नगरेको गुनासो गरे । उनले राजस्व बाँडफाँड, जग्गाको सदुपयोग, वन र नदीजन्य पदार्थको निकासीमा आफूहरूको असन्तुष्टि रहेको बताए । यस्तै कार्यक्रममा जिल्ला समन्वय समिति रुपन्देहीका प्रमुख उमाकान्त चपाई, संविधानविद् काशीराम दाहाल लगायतले बोल्दै स्थानीय सरकारले जनताको भावनालाई आत्मसाथ गर्दै नीति अगाडि सार्नुपर्ने बताए । बुटवल सहित सीमा जोडिएका पालिकाका जनप्रतिनिधि, राजनीतिक दलहरूका प्रतिनिधिहरू कार्यक्रममा सहभागी थिए ।