खोज

काठमाडौँ, १८ जेठ ।

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले गणतन्त्र कुनै एक दल वा व्यक्तिको मात्र नभई सम्पूर्ण नेपाली जनताको साझा उपलब्धि भएको बताएका छन्। आइतबार काठमाडौँमा आयोजित वाइसीएल नेपालको तेस्रो राष्ट्रिय सम्मेलनको उद्घाटन गर्दै उनले गणतन्त्रलाई माओवादी र प्रचण्डसँग मात्र जोडेर प्रचार गर्नु जनतालाई भ्रममा पार्ने प्रयास भएको दाबी गरे।

“अहिले कथित राजावादीहरूले भन्न थालेका छन्— यो गणतन्त्र त माओवादीले ल्याएको हो, अझ तिखारेर भनिएको छ कि प्रचण्डकै गणतन्त्र हो,” प्रचण्डले भने, “बेकारमा कांग्रेस र एमालेले आफूलाई गणतन्त्रवादी भन्नु पनि गलत हो भन्ने प्रचार गरिएको छ।”

उनले स्पष्ट पारे कि गणतन्त्रको आन्दोलनमा माओवादीको भूमिका निर्णायक भए पनि यो आन्दोलन सबै उत्पीडित वर्ग, समुदाय र जनताको संयुक्त संघर्षबाट सम्भव भएको हो। “सिर्जनात्मक आन्दोलन, सशस्त्र विद्रोह र जनताको बलिदानबाट आएको गणतन्त्र सबैको साझा सम्पत्ति हो,” उनले जोड दिए।

प्रचण्डले अन्य दलहरूले पनि अन्ततः गणतन्त्रको पक्षमा उभिएको स्मरण गराउँदै माओवादीलाई एक्ल्याउने उद्देश्यले “प्रचण्डको गणतन्त्र” भन्ने शब्दावली प्रयोग गरिएको आरोप लगाए। “यो कुनै प्रचण्डको एकल उपलब्धि होइन, यो सम्पूर्ण नेपाली जनताको साझा उपलब्धि हो,” उनले दोहोर्‍याए।

उनको भनाइमा, गणतन्त्रप्रति बहस हुनु स्वाभाविक भए पनि त्यसलाई बदनाम गर्न वा राजनीतिक स्वार्थका लागि अपव्याख्या गर्नु अस्वीकार्य छ।