खोज

गुल्मी, १७ जेठ ।

जापानको औपचारिक भ्रमणको क्रममा जापान गएका मुसिकोट नगरपालिका प्रमुख जिवलाल खरेल जीवनलाई गुल्मेली समाज जापानले एक कार्यक्रमका बिच सम्मान गरेको छ । गुल्मेली समाज जापानको मुख्य आयोजना एवं मुसिकोटबाट जापानमा रहेका ९ वटै वडाका विभिन्न सङ्घसंस्थाको सह आयोजनामा उक्त सम्मान गरिएको हो । जापानको आईता प्रान्तस्थित बुङ्गो ओनो नगरपालिकाको निमन्त्रणामा नेपालदेखि जापान भ्रमणमा गएका नगर प्रमुख खरेललाई समाजको तर्फबाट स्वागत गर्दै उनलाई सम्मान गरिएको हो । सोही अवसरमा टोकियोमा नगर प्रमुखसँग अन्तर्क्रिया तथा भेटघाट कार्यक्रम समेत आयोजना गरिएको थियो ।

गुल्मेली समाज जापानका अध्यक्ष एवं समाजसेवी महेन्द्र कुमार अधिकारीको अध्यक्षतामा सम्पन्न उक्त कार्यक्रममा विभिन्न सङ्घ संस्थाका प्रतिनिधिहरूले मुसिकोटको विकासमा चासो व्यक्त गरेका थिए । उनीहरूले सिङ्गो मुसिकोटलाई कसरी संवृद्ध बनाउन सकिन्छ भन्ने विषयमा गहन रूपमा छलफल एवं अन्तर्क्रिया गरिएको गुल्मेली समाज जापानका प्रवक्ता एवं वामी सेवा समिति जापानका अध्यक्ष दिलीप थापाले जानकारी दिए । सम्मान कार्यक्रममा प्रमुख नगर प्रमुख खरेलले आफू मुसिकोटको समृद्धि र विकासमा लागि परिरहेको भन्दै उक्त कार्यमा मुसिकोटवासीहरूको सहयोग एवं सकारात्मक सुझावको अपेक्षा गरेका छन् । कार्यक्रममा गुल्मेली समाज जापान सहित विभिन्न संघसंस्थाहरूको तर्फबाट संयुक्त रूपमा विशेष सम्मान गरिएको थियो ।

कार्यक्रममा नगर प्रमुखबाट गुल्मी–मुसिकोट नौमती पञ्चेबाजा समूहलाई कला र संस्कृतिको संरक्षणमा पुराएको योगदानको कदर गर्दै सम्मान गरेका थिए । सोही अवसरमा नेपालबाट जापान भ्रमणमा गएका अभिभावकहरूलाई पनि समाजको तर्फबाट सम्मान गरिएको थियो ।
सोही अवसरमा भर्खर मात्र मुसिकोट नगरपालिका र जापानको बुङ्गो ओनो नगरपालिका बिच भागिनी सम्बन्ध स्थापित गराउन विशेष भूमिका निर्वाह गर्ने एनआरएनए जापानका पूर्व अध्यक्ष एवं समाजसेवी रोशन केसीलाई कार्यक्रममा धन्यवाद पत्र प्रदान गरिएको थियो ।
कार्यक्रममा गुल्मेली समाज जापानसँगै मुसिकोटबाट जापानमा रहेका ११ वटा विभिन्न सङ्घसंस्था एवं मुसिकोट नगरपालिका बिच १४ बुँदे सम्झौता पत्रमा हस्ताक्षर समेत गरिएको थियो । मुसिकोट नगरपालिकाको तर्फबाट नगरप्रमुख जीवन खरेल जीवन र गुल्मेली समाज जापानका अध्यक्ष महेन्द्र कुमार अधिकारीद्वारा संयुक्त रूपमा सम्झौता पत्रमा हस्ताक्षर गरिएको हो । उक्त सम्झौता पत्रमा दुवै पक्षले आफ्नो जन्मभूमिको विकासको लागि आगामी दिनमा लगानीमैत्री वातावरण बनाउनका लागि सहयोग र सहकार्य गर्दै अघि बढ्ने उल्लेख गरिएको प्रवक्ता थापाले बताए ।

स्वागत तथा सम्मान कार्यक्रममा एनआरएनए जापानका अध्यक्ष नविन निउरे, उपाध्यक्ष सिद्धार्थ श्रेष्ठ, सुभास लामिछाने, महासचिव टीकाराम खरेल, गुल्मेली समाज जापानका संस्थापक अध्यक्ष बाबुराम भण्डारी, पुर्व अध्यक्ष शालिकराम भण्डारी, संस्थापक सचिव कुलचन्द्र खरेल, सल्लाहकारहरू शुरेस केसी, किसन शर्मा, बुद्ध रायमाझी, देवी अर्याल, शंकर सापकोटा, इश्वरी सापकोटा, राम प्रसाद गौतम, मुसिकोट नगरपालिकाका ९ वटै वार्डका विभिन्न संघसंस्थाका अध्यक्ष एवं पदाधिकारीहरू लगायतको सहभागिता रहेको थियो । गुल्मेली समाज जापानकी सचिव कामना भण्डारीको स्वागत मन्तब्य रहेको उक्त कार्यक्रमको सञ्चालन समाजका प्रवक्ता दिलीप थापाले गरेका थिए ।