खोज

बर्दघाट, १६ जेठ । 

शुक्रबार राती २ बजेदेखि अवरुद्ध दाउन्ने सडक खण्ड एकतर्फी सञ्चालनमा आएको छ । बर्दघाट नगरपालिका वडा नम्बर ४ अन्तर्गत पर्ने खुर्सानी खोला नजिकैको बाटो भस्किएपछि सडक अवरुद्ध बनेको थियो ।  खुर्सानी खोलामा आएको बाढीले सडक भत्काए पछि सडक पूर्ण रूपमा अवरुद्ध बनेको थियो । बिहान करिब ६ बजेबाट भस्किएको सडक मर्मतको काम सुरु भएको थियो । तत्कालका लागि एकतर्फी बाटो सञ्चालन गरी सवारीलाई गन्तव्यतर्फ पठाउने र ट्राफिक व्यवस्थापन भएपछि थप मर्मतका काम निर्माण कम्पनीले जारी राख्ने जिल्ला ट्राफिक प्रहरी कार्यालय पश्चिम नवलपरासीका  ट्राफिक प्रहरी निरीक्षक अमृत भण्डारीले जानकारी दिए ।

भस्किएको सडक छेउमै विद्युत् पोल रहेकोले सडक मर्मतमा कठिनाइ भइरहेको र विद्युत् प्राधिकरण सँगको समन्वयमा सडक मर्मतको काम भइरहेको भण्डारीले जानकारी दिए ।   दाउन्ने सडक खण्डको अहिले भस्किएको करिब ५० मिटर पूर्वमा पनि गत शुक्रबारको वर्षाको कारण करिब ११ घण्टा सडक अवरुद्ध भएको थियो ।

सामान्य वर्षामा समेत सडक पूर्ण रूपमा अवरुद्ध हुँदा पूर्व पश्चिम राजमार्ग भई यात्रा गर्ने यात्रु र सञ्चालन हुने सवारीहरूले सास्ती पाएका छन् । खुर्सानी खोलमा बनेको पुल र पुलको अगाडी पछाडिको सडक ढलान बाटो सञ्चालनमा आउन नसक्दा सवारीहरू डाइभर्सन हुँदै आवत जावत भइरहेका छन् । सामान्य वर्षामा समेत डाइभर्सन गरिएको सडकले पानी थेग्न नसक्दा पटक पटक सडक भस्किँदै आएको छ ।