खोज

 काठमाडौं, १५ जेठ ।

आगामी आर्थिक वर्ष २०८२/०८३ का लागि युवा तथा खेलकुद क्षेत्रमा अहिलेसम्मकै बढी ६ अर्ब ८ करोड रुपैयाँ बजेट विनियोजन गरिएको छ। अर्थमन्त्री विष्णु पौडेलले संसद्मा प्रस्तुत गरेको बजेट यो क्षेत्रमा विगतको भन्दा २ करोड ५८ लाखले बढी रहेको छ।

अघिल्लो आर्थिक वर्षमा यस क्षेत्रमा ३ अर्ब ५० करोड रुपैयाँ विनियोजन गरिएको थियो भने आव २०७६/७७ मा ३ अर्ब ९९ करोड रुपैयाँ विनियोजन सबैभन्दा उच्च थियो।

अर्थमन्त्री पौडेलले खेल पूर्वाधार निर्माण र खेलाडीको व्यावसायिकता विकासमा लगानी बढाउने प्रतिबद्धता जनाउँदै निजी क्षेत्रलाई खेल पूर्वाधारमा लगानी गर्न आकर्षित गर्ने योजना सार्वजनिक गरे।

झापाको दमकमा अन्तर्राष्ट्रिय स्तरको आधुनिक रंगशाला निर्माण गरिने छ भने सोलुखुम्बु, मुस्ताङ लगायत हिमाली क्षेत्रमा हाइ अल्टिट्युड स्पोर्ट्स स्टेडियम निर्माण गरिनेछ।

कीर्तिपुरस्थित टीयू अन्तर्राष्ट्रिय क्रिकेट मैदानको स्तरोन्नतिका लागि ४० करोड बजेट छुट्याइएको छ। मुलपानी, फाप्ला, सिद्धार्थ क्रिकेट रंगशाला र गिरिजाप्रसाद कोइराला क्रिकेट मैदानको स्तरोन्नतिका लागि कुल ४२ करोड विनियोजन गरिएको छ।

राष्ट्रिय खेलकुद परिषद् (राखेप) का सदस्य सचिव टंकलाल घिसिङले यस बजेटलाई उत्साहजनक रहेको भन्दै सकारात्मक प्रतिक्रिया दिएका छन्।