खोज

सल्यान, १४ जेठ ।
सल्यानका महिलाहरूले आफूले सिकेको सीपलाई आम्दानीको बाटोमा लैजाने भन्दै आत्मविश्वास बढेको बताएका छन् । जिल्लाको छत्रेश्वरी गाउँपालिका वडा नम्बर ३ दारिम ज्युलामा एक महिने एडभान्स कटाइ सिलाइ सम्बन्धी सीप विकास सम्बन्धी तालिम लिएपछि महिलाहरूले आफूले सिकेको सीप र सिलाइ मेसिनलाई आम्दानीको माध्यम बनाउने अठोट गरेका हुन । यद्यपि थप दक्षताका र व्यवसाय सञ्चालनका लागि सरकारी तवरबाट सहयोगको अपेक्षा छ । मङ्गलवार आयोजित तालिम समापनमा बोल्दै सहभागी रमा डाँगीले तालिमबाट जीवनमा केही गर्न सकिन्छ भन्ने हिम्मत आएको बताउँदै सिकेको सिपलाई व्यवहारमा लागु गर्ने प्रतिबद्धता जनाइन ।

छत्रेश्वरी गाउँपालिकाको आयोजनामा गत वैशाख १५ गतेदेखि सञ्चालित एडभान्स कटाइ सिलाइ सीप विकास तालिम मङ्गलवार सम्पन्न भएको हो । तालिममा सहभागी १३ जना महिलाहरूले सिलाइ मेसिनको दक्ष प्रयोगदेखि लिएर गला, बाउला, पाइपिङ, डिजाइन कुर्ता, पटेला सुरुवाल, चौबन्दी चोली, जेन्स स्कुल सर्टपाइन्ट, म्याक्सी, पाइजामा आदि सिलाउने सीप सिकेका थिए । सहभागीहरूले तालिमलाई आफूहरूको जीवनमा परिवर्तन ल्याउने अवसरका रूपमा लिएको बताएका छन् ।समापन कार्यक्रममा छत्रेश्वरी गाउँपालिकाका अध्यक्ष ओज बहादुर बुढाथोकीले महिलाहरूलाई स्वरोजगारतर्फ उन्मुख गराउँदै आत्मनिर्भर बनाउनु र सिपमार्फत जीविकोपार्जनमा सहयोग पु¥याउनु पालिकाको लक्ष्य भएको बताए । उनले सिकेको सीपलाई व्यवहारमा उतार्न आग्रह गर्दै पालिकाले आगामी दिनमा पनि यस्ता कार्यक्रमलाई निरन्तरता दिने प्रतिबद्धता व्यक्त गरे ।

यस्तै गाउँपालिका उपाध्यक्ष बुद्ध कुमारी खत्रीले महिलाहरू सक्षम भएमा त्यसको प्रत्यक्ष प्रभाव परिवार, समाज र समग्र गाउँपालिकामा देखिने बताउँदै कटाइ सिलाइ सीपलाई प्राथमिकता दिएर व्यावसायिक रूपमा अघि बढ्न सुझाव दिइन । कार्यक्रममा कार्यपालिका सदस्य पवित्रा डाँगी, वडा सदस्य जयकली विक, उद्यम विकास सहजकर्ता निमा बस्नेत, प्रशिक्षक बसन्ती खड्का लगायतले सिपको महत्वबारे चर्चा गर्दै तालिम लिएका महिलाहरूलाई हौसला प्रदान गरेका थिए । गरिबी निवारणका लागि लघु उद्यम विकास कार्यक्रम अन्तर्गत गाउँपालिकाले तालिम सञ्चालन गरेको हो ।